another new year wzout you

يمكن أكبر سبب لإكتئابى (بعيدا عن ظروف الحياة والعيلة) هو أنى

فقدت أقرب صديق ليا فى الحياة والتدوين.... كنا عملنا مدونة مشتركة

نهيس فيها بس مات وسابنى ويمكن اغلبكو ميعرفش اسمه الحقيقى

وكل اللى يعرفه عنه اسم فـــــــــــارس على اسم مدونته... بس

انا حعرضلكو صورته اللى صورتهاله يمكن فى اخر مرة اتقابنا

فيها انا وناس صحابنا وبكشف اسمه الحقيقى محمد وبقوله .... محمد انا بحبك

اوى يمكن مجتش الفرصة انى اقولك ده فى وشك او فى حياتك بس بجد

انا بحبك جدا اكتر مما تتخيل كنت ليا كاتم اسرارى وأخويا الصغير

وصديق بجد .... فاكر يوم مادخلنا فيلم 45 يوم؟؟؟

وهلكنا على نفسنا ضحك فى وسط الفيلم الكئيب ده من غير سبب؟؟

فاكر يوم لما فرجنا علينا سيلنترو كله وبهدلنا الويترز؟؟

طب فاكر لما خدناها مشى من ابراج نايل سيتى لحد رمسيس؟

ولما عدينا على وزارة الخارجية عشان نقدم فى امتحانات

السلك الدبلوماسى؟؟ فاكر فرحو بينا ازاى وقالولنا اننا جيل واعد؟؟

فاكر ساقية الصاوى وحفلة عمر خيرت؟؟

فاكر دعمك ليا فى كل حاجة؟؟

حقيقى بجد موتك كسرنى

وحقيقى وحشتنى أوى ............أوى

كتـــــــــــــــــــــــــــــير إشتقتلكون

وحشتونى جدا جدا جدا وان كنت عارفة انى وحشة

ومقصرة وكل الشتايم دى بس انا

بجد حالتى ازفت من الزفت

:)

وعد اجى قريب واكتب بوست

كــــــــــــــــــــــــلب وراح

فى أهرام الخميس 22 مايو صدر مقال فى صفحة التحقيقات

عن تجربة أجرتها كلية طب جامعة المنصورة حول موت جذع المخ وهل هو وفاة ام لا؟


طبعا الموضوع ده قتل بحثا قبل كده بس لاننا متخلفين فى كل حاجة لسة

دمغتنا ماإقتنعتش بإن موت جذع المخ هو موت فعلا وان دى

فعلا الفترة المناسبة للتبرع بالاعضاء ( ده لو كل معانا موضوع اننا نتبرع ده).. الموضوع

جيد وبادرة مشرفة من جامعة اقليمية


لكن المشكلة التجربة دى اتعملت ازاى؟؟؟

عن طريق فصل رأس كلب عن جسمه ووضعه على أجهزة تنفس صناعى

لقو انه فضل يتنفس 18 ساعة والكبد والكلى شغالين والقلب

والرئة زى الفل.... لحد مافصلو الاجهزة وده دليل دامغ على ان موت

جذع المخ مختلف تماما عن الغيبوبة

بس لاننا جهلة ...... ومبنسألش ( أهل العلم).....وبنسأل على طول

الشيوخ حتى فى علاج الانزلاق العضروفى


ماعلينا ده موضوع تانى ابقى اتكلم فيه بعدين


المهم.... كل الكلام اللى اتقال جميل جدا بس المثير للغيظ ان المقال لم يأتى

ولو بلفته ذكر إذا كان الكلب إتخدر قبل الجراحة أو لأ


طبعا ممكن يكون إتخدر بس لإحساسهم إن دى حاجة لا تهم الناس فمذكروهاش


ده غير ان كان فيه حيوانات تانية أولى من الكلب فى العملية زى الخنزير نفس الحجم ويفى بالغرض


بس طبعا لاعتبارات سياسة ميستجروش يعملو كده

أو جاموسة او عجل أو حتى معزة ..كلها حيوانات المجتمع واخد على فكرة دبحها

لكن لا طبعا .... ليه الباشاوات يكلفو نفسهم؟؟؟؟؟

مش كفاية إتكرمو وإتعطفو وإتنازلو يعملولنا تجربة كتر خيرهم عشان يشيلو جهلنا ده!!!!

كمان حيصرفو ويشترو؟؟؟؟؟

ده حتى يبقى عيييييييييب اوى!!

طب هل حطو فى اعتبارهم إنهم يختارو كلب مريض بحيث يبقو بيريحوه من دنيته؟؟؟


أكيد لأ


أكيد بعتو ممرض الشارع خد كلب مسكين من وسط ولاده أو كلبة

وبدون اى اعتبارات أخلاقية للرفق بالحيوان ( دبحوه) بحجة اسعاد البشرية


ناهيك عن التجربة اصلا مالهاش لزمة

لان اللى اقتنع اقتنع بكلام العااااااااالم كله بما فيها – حسب ذكرهم- السعودية وايران

واللى دماغه جزمة مش حيقتنع ولو الميت قام قاله انه مات


تجربة مالهاش لزمة خالص ولكن قلت يشكرو

لكن ياأستاذة الطب وملايكة الرحمة والراحة عيييييييييب اوى

الكلام ده لو فى امريكا أو اى دولة محترمة كانت منظمات

حقوق الحيوان قفلتلهم المستشفى وهات ياتحقيق

لكن هما أكيد حتى لم يراعو إختيار كلب مريض بحيث يكون موت رحيم

وأظن أنهم لم يراعو تخديره أو على الاقل لم يراعو اعلامنا بإنه كان مخدر وقت اجراء قطع الرأس

يعنى مثلا فيلم iam a legend الفيلم ده كتبو فى التتر تنويه ( لم يصب أى حيوان بأذى خلال تصوير هذا الفيلم) واللى

شاف الفيلم أكيد عارف ليه كتبو كده..

عارفين إن المجتمع مهتم جدا جدا بالجملة دى وكل الافلام بتكتبها إجبارى

بس وحياة والدك ماتقوليش علاج الأمراض والهدف الأسمى وحقوق

الإنسان الأول وإحنا لاقين ناكل والكلام ده....اه جعانين وبيأكلونا كلاب كمان

بس المفروض إنه من ورانا

مش بحث علمى وفخورين بيه أوى !!

الرحمة عمرها ما كانت رفاهية

الرسول (ص) وصانا على الحيوانات.... مقالش خدو بالكم

منهم وإنتو شبعانين بس ولما تجوعو بهدلوهم !!!!

خصوصا إن الكلب حيوان (( المفروض)) إنه لايؤكل


أنا نفسى ناخد وقفة والموضوع ميعديش بالساهل

على الأقل يحسو إنهم عملو جريمة وإننا شعب واعى

مش شعب رعاع همج ومانعرفش الرحمة والرفق بالحيوان

ولأن ديننا وصانا عليييييييييييييهم
.
.
.
.
أنا أسفة اتعصبت جدا بس أنا بكتب البوست والجرنان جنبى

ودمى بيغلى والله أكاد أكون حسة بغليان الدم جوة عروقى ..... مقدرش استنى

لإن الضحية لا حول لها ولا قوة

حتى مش انسان حيصوت ويرفض والدستور والمصرى اليوم

يقلبو الدنيا عشانه وعشان تعذيبه......بالعكس ده مات فى صمت مبارك من كل الناس


مرفق بالبوست صورة الجراحة والكلب رأسه جنبه

الصورة كمان ححطها كابانر عندى عشان افتكر دايما الجريمة دى

تحديث : اسفة للتأخير فى الرد بس كنت عاوزة

الموضوع يتقرى.....وياريت طلب غلس رجاء قراءة ردودى

عشان انا بعتبرها تكملة للبوست

وطن مهمته إثـــــــارة الدهشة

من كام يوم اتفجرت الازمة اللبنانية اللى اكيييد كل الناس

عرفتها بتاعت كاميرات المطار بتاعت حزب الله واقالة شقير

مديرأمن المطار وبعدين تصريحات نارية للحكومة

وجنبلاط وجعجع والحريرى وميشيل عون وبرى

اعقبهم تعقيب نارى ان لم يكن صادم للسيد حسن نصرالله

يتكلم فيه عن القوة ويلوح بإمكانية استخدامها داخليا !!!

ويتهم جنبلاط على الهوا انه خاين وعميل وقاتل وكذاب !!!!

كلام كبيييير اعقبه ضرب نار فى الشارع وقتل ناس كتير وهدم بيوت

لحد ماالناس تصورت ان خلاص البلد بتجيب درفها

وقناة العربية ( كالعادة) نسيت الحياد الاعلامى وخدت

رأى السعودية اللى هو رأى السنيورة والحريرى

وهاتك ياهجوم على حزب الله – اللى والشهادة للتاريخ اظهر انه قوى جدا- حتى

احنا خارجية وصحافة مرمطناهم

كأننا لبنانيين ولنا فيها

فجأة بــــــــــــــــــــــــــــــــــخ

اه بخ

كل حاجة خلصت زى مابدأت مليشيات غريبة مدربة خارج لبنان

ثبت تورطها فى الاضطرابات وجنبلاط كش وطلب توفير حماية

شخصية له والسنيورة رجع شقير تانى منصبه وحيعيد النظر فى القرارات

شبكة الاتصالات بتاعت حزب الله والدنيا رجعت

زى الفل ولا كأن فيه اربعين حد مات

عموما انا عن نفسى مش فاهمة حاجة

ياريت لو حد فاهم يعنى يفهمنى لان قالو ان ايران وراها

وانا عن نفسى شمة ريحة اسرائيل بس مش عارفة احدد اتجاه الريحة فى تصريحات حد معين


بس برضه سيبوكو من ده كله ...... الناس اللى ماتت لايمانها بأحزابها دول ايه؟؟؟


تصور معايا كده لو الموضوع فى مصر.... ولا كان حد حيعبر

طبعا كتير ممكن يقولو ان ده قمة الهبل

انه يموت عشان حزب مش طائفة دينية او ارضه

لأ. ده واحد مقتنع ببلده وحبها وحب حزبه وحاسس انه فارق وبيناضل عشان هو فارق

البلد دى ياجدعان مش بلد عرى ومذذ وخمرا وبس

البلد دى من الكبير للصغير بيلعب سياسة ..... مش بيعجن سياسة زينا

واحد الله يمسيه بالخير راحها ورجع يقولى : - ايه ده؟؟؟ دول مؤرفين

- ليه ياحاج بس؟؟؟

- يقولى المذة من دول لابسة مش هدوم وزى القمر

وقاعدة بتتكلم فى السياسة !!!! بلد ايه دى يااختى.

عن أحمد رشدى

كتير منا مايعرفوش احمد رشدى او يعرفوه

وناسيينه او مهتموش يعرفوه

اللواء احمد رشدى وزير داخلية مصر فى منتصف الثمانينات

يعنى فى الايام المباركة والعهد المبارك

سوف اذكر لكم موقفا له بس عشان تعرفو

ان وزارة الداخلية مش كل

تاريخها اسود من ايام سجن الاجانب لحد النهاردة والاعتقالات

وان كان ليها فترة كانت وزارة محترمة بوزير محترم

المكان: ميدان روكسى

الزمان : ظهيرة احد الايام

الحدث: ضابط شرطة ماشى بعربيته فى الميدان والاشارة حمرا

لكن لانه ضابط كسرها ومشى

قام عسكرى المرور كتب له مخالفة

الضابط شافه بيكتب مخالفة لف ورجعلة وشاروله

عالبيريه الميرى اللى عالكبوت

وقاله : انت مش شايف ده ياابن الكلب؟؟؟؟ وقام رزعه قلم على وشه

لجل حظه ميدان روكسى يقع فيه بيت مين؟؟؟

السيد احمد رشدى وزير الداخلية وقتها

قبل ما الموقف ده يخلص الميدان شهد الاتى

السيد الوزير بنفسه فى وسط الميدان بالبيجامة الكستور

اه والله

ماهو حظه ان الوزير شاف الموقف من بلكونته

نزل الوزير ووقف عربية الضابط

وقاله : انت بتتعدى على موظف اثناء تأدية عمله ياابن الكلب؟؟؟

وقام رازعه نفس القلم اللى كان هو لسه مديه للعسكرى

وقاله : حالا تسلم رتبتك انت متحول للتحقيق

وابقى قابلنى لو خدت لرتبه دى تانى

** الموقف ده يحفظه التاريخ لذلك الرجل العظيم

اللى ممكن ابقى احكيلكو عنه تانى بعد كده

واللى ( غار) منه النظام لحب الناس له فمشوه

ونكبونا بزكى بدر صاحب معارك المخدرات الشهيرة

مش عارفة انا حكيت الموقف ده ليه؟؟؟

واشمعنى دلوقتى فى ظل غلا بنزين ولغى قانون مرور

واعتقالات واضرابات واعتقالات تانى .. يمكن عشان بتحسر على الشرفاء

فى بلدنا ومدة وجودهم فى المناصب ؟؟؟

ماليش نفس

ماليش نفس لأى حاجة

لا اتكلم فى السياسة ولا الادب و حتى قلة الادب

مش عاوزة اكتب

احتمال اغيب فترة......مش بسبب ضغوط لكن بسبب زهق

مليون موضوع معفرتين دماغى لكن مش عاوزة اكتب عنهم


لا عن الغلا ولا الاضراب ولا المحليات ولا القبض


على كفاية والاخوان ولا عن اخر كتاب قريته ولا عن فارس احلامى


وعندى صور كتير عاوزة احطها منها صور


مصوراها بنفسى بس برضه ماليش نفس


عن اشعار نادرة جدا جدا عاوزة اقلوكو عليها بس مليش نفس


عاوزة اشتم فى شوبير والحجاب والزمالك وعبد الناصر وماما واخواتى

بس ماليش نفس

عاوزة اسمع اغنية رومانسية جدا


وارقص تانجو واشرب سيجارة بس ماليش نفس


عاوزة العن سلسفين اهل احمد العريان عشان الاوبريت التجارى البحت


بتاع الضمير العربى اللى تاجر فيه بالآلآم الناس .....بس ماليش نفس


عاوزة اشتغل واصحى بدرى واقرا اكتر واتجوز واعاند واحارب بس ماليش نفس


عاوزة اشترى فستان عشان خطوبة بنت خالى بس ماليش نفس


عاوزة اعمل دايت وابطل أكل شوية......بس ماليش نفس


عاوزة اتفرج على برنامج عدل فى التليفزيون او


اتابع مسلسل او اسمع نجوم اف ام....بس ماليش نفس


عاوزة احط روج واروح اعمل باديكير بس ماليش نفس


عاوزة البس مذة او اكون مرحة او البس جلابية واسعة اوى....بس ماليش نفس


عاوزة اقول لا..........بس ماليش نفس


عاوزة اطلع فى مظاهرة او او اقتل مبارك اواقتلنى انا.....بس ماليش نفس


عاوزة اغنى او اعيط او اصلح ساعتى بس ماليش نفس


عاوزة اقطع مع كل صحابى او اتعرف على حد جديد بس ماليش نفس


عاوزة الاقينى او اعترف انى ضيعتنى بس ماليش نفس


عاوزة حتى اختم البوست واقول باى باى .......بس ماليش نفس

والنبى انتو احكمو

أنا : مش ممكن دماغى حتفرقع .....بقالى اسبوع بحاول اقرى كتاب لفرويد

الراجل ده بيتعمد يغيظنى

حسة انى بيطلعى لسانه كل مرة ويقولى امشى ياجاهلة :(

هو: مين فرويد ده؟؟ مخرج افلام سكس؟؟؟

سبعة باب

قريت قريب مسرحية "7 باب" للكاتب الشاب " محمد عادل عبد العظيم "


وهى مأخودة - مع كتير من التصريف- من حلقة الرعب للعظيم " د\أحمد خالد توفيق "


" خلف الأبواب المغلقة " من سلسلة ماوراء الطبيعة


قام بتقديمها د\أحمد بنفسه .. وهو شرف احسدك عليه يامحمد


المسرحية تدور فى مكان واحد كما هو فى النص الاصلى

اسماء الشخصيات كما هى النص الاصلى وكذا عددهم

لكن " رفعت اسماعيل " تغير كتيرا

قرأت المسرحية فى ساعتين وهذا دليل على جودتها

طبعا لست انا العظيمة التى تعطى لنفسها حق النقد

لكنى أزعم انى قرأت عدد لابأس به من المسرحيات المكتوبة وهو كما قال د\ أحمد شئ غير شائع

لذا فكان لى بعض الملاحظات التى دعوت مؤلف المسرحية بذاته لقرائتها

حتى لا اتهم بالغيبة والنميمة وكده

وقد رتبت هذه الملاحظات فى نقط .........


1-رفعت اسماعيل لم يبد كرفعت المعروف لعشاقه و اعتقد ان ذلك لن يكون مستساغا

لذا كنت اتمنى ان يتغير اسمه فقط لمحمد اسماعيل او رفعت ايوب او شئ اخر عدا رفعت اسماعيل

2-لشاعرة نادية تشكو من ان نظرات الناس تنهش جسدها لانهم يعتقدو انها امرأة

سهلة ولذلك فهى تقرر الزواج فى السر !!

ماذا يفيدها ذلك؟؟

اذا لم يعرف الناس انها متزوجة فسيظلوا كما هم فى نهش لحمها.....خاصة مع

رؤياهم لرجل غريب يتردد على منزلها كثيرا

وهو مالم يفسر او يوضح فى المسرحية

3- هل الشاعرة نادية كبيرة فى السن ام صغيرة؟؟؟ جميلة؟؟

بمعنى عندما تقول انهم يطمعون فى جسدها ينظر لها على مسكينة ام مجنونة متصابية؟؟

4-إصرار سمير على مناداته " بابا رفعت" لو كان مستعد ان يكون ابنه حقا كان من المفترض ان يقول بابا فقط

5- كيف يتهم "محمود" انه كتب الفيلم لانه " ناقص شهرة" كيف وقد كتب الفيلم تحت اسم مستعار أصلا؟؟؟

6-صفحة151...." المدير بيخنق عالموظف" لم تكن كلمة يخنق على موجودة عام 1970

7-المخرج يراعى أداب الحوار عندما يتكلم عن " ولاد الشرا....." ثم يسكت هذا

غير مبرر لإن ببساطة النساء الموجودات احداهن شاعرة بوهيمية ومتزوجة سرا من زوج صديقتها

والأخرى كان ينام هو نفسه معها فى غياب زوجها والثالثة هيام كانت غائبة عن

الوعى........... حتى اذا لم تكن,, كل هذا الموقف نفسه يدعو للشتائم المستمرة ,

وانى لاستغرب انهم لم يفعلو ذلك من البداية بإمطار "جابر"

بوابل لعناتهم .......فالموقف المتحفظ يبدو غير واقعى فلا مكان لهذا الترف الاخلاقى

8- سمير والشاعرة كانو تحت فين عندما ذهب لتهدئتها؟؟

وطالما ان هناك" تحت" و مطبخ لماذا لم يناقش فكرة استخدام ادوات من المطبخ

لكسر الباب الرئيسى للفيلا......حتى ولو لغلق

باب ذهن القارئ عن التفكير فى هذا الاحتمال فيما بعد

9-نقطة " جوزى متدين ده حتى قالى إتحجبى اكتر من مرة"

أولا: لم يكن هناك حجاب شائع عام 1970

ثانيا: جمهور المسرح اكثر وعيا من ان نربط له الدين بالحجاب.... وهناك فئة

من الممكن ان تأخد ذلك على انه منحنى لايليق بالمسرح المثقف

10- مفهمتش وجهه نظر ناهد عندما قالت انها " متقدرش تقول لراجل

بيضحك عليها روح شوفلك واحدة من الشارع"

ليه متقدرش؟؟؟

11- صفحة 119 .......ليه بهت الجميع عندما عرفو ان هيام " مش أنسة"!!!!!!

فهى ممثلة وفى السبعييييينات.. فهل متوقع ان تكون انسة؟؟؟

فناهيك عن العلاقات فجميع الممثلين يتزوجون مليار مرة فى السر .....غير مبرر على

الاطلاق بالمرة هذه الصدمة


12- صفحة 122......ملابسات اغتصاب هيام غير منطقية بالمرة بالمرة بالمرة بالمرة

*****************************

رغيت بالهبل لأ ورطنت بالفصحى عشان تعرف انى اقدر ياللى فى بالى هه؟؟ ;)

..... قد يبدو نقدى احمق انا عارفة

ونقد واحدة " فاكرة نفسها حاجة" بس الاكيد انه نقد مشاهدة

وقارئة همها الاول - والله العظيم - ان المسرحية تكون احلى

هابــــــــــــــــــــــى فالانيتاينز

عاوزة فتى احلام تفصيل

عاوزة راجل افصله على ذوقى

كلمة ذوقى مش كلمة مهينة على فكرة ويمكن


لما تشوفو المواصفات تحسو ان عندى حق ومطالبى


عادلة جدا بس هو الرجالة ظلمة شوية


انا حاخد من كل راجل عرفته فى حياتى صفة


او اكتر.. وحيدينى فى الاخر انسان مثالى وانا حرفيا بقى زى الافلام


اعيش خدامة تحت رجليه لانه حيكون بمثابة إله للحب.


انا حقول الصفات وأسماء الناس بس رجاءا محدش يسأل مين دول؟


لانى ده حيكون سؤال بلا اجابة



الشكل: مش حقول رشدى اباظة المرة دى حكون واقعية جدا

*الشكل : شريف مش قمر ولا سبع مذذ فى بعض بس حلو فى نظرى جدا

شكله رجولى جدا ( شبه تييرى أونرى) عشان لو حقرب الصورة

*الاناقة : شريف وحسام بس اكتر شريف

*الجسم : شريف رغم انه رفيع الى حد ما بس عنده عضلات واناقته لايقة عليه

* يكون بيحبنى زى أمى بس والنبى مش بنفس الكيفية احسن اغتاله


من الاخر يكون بيتنفسنى ..... ومؤمن بيا جدا .... وعارف مفاتيحى صح


*حاخد من احمد خشونة التعامل المحببة للستات.....التدليع السوقى المحبب ايضا .....


والرومانسية التقيييييييييلة اللى مبتبانش غير فى وقتها


*المرح من صديقى اللدود ايمن


*خاحد من يحيى لكنته الاجنبى المتقنه ورغبته فى الحياة فى مخيمات اللاجئين


*من حسام اللهجة اللى بوظتلى المصرى خالص بس مش طول الوقت ابوس رجلك


*المناقشات الفكرية والجدليه والدينية والسياسية والهرطقة احيانا من احمد ومحمد الله يرحمه


*المناقشات الفنية من الخبير بلا منازع فى احسن الافلام واختياراته بجد فزييييييييعه من احمد ( نفس الاحمد)


*الهدايا القيمة من حسام


*الحالة المادية وكده من حسام وشريف ومؤيد وواحد كنت اعرفه


زمممممماااااااان بضين كده بس حالته المادية جيدة جدا


*من شريف ثقافته اللى مش ماشى يقول لكل الناس عليها


لكنه دايما بيفاجئنى لما اجيبله كتاب من الهونولولو وبيطلع قراه


*من احمد اننا حنشغل مجموعة الجزيزة وسوبر موفيز بس. لأغلب الوقت


*الاخلاق والضمير من محمد ياسر ولما اقول ياسر يبقى بقول قديس


*من محمد ياسر طيبة قلبه ونفس الصفة حاخدها من مؤيد


*التدين منى انا :) لانى مش معقول اخد حد تدينه اعلى او اقل منى


*الافكار التحررية من رامز الله يمسيه بالخير بقى ومن يحيى


*الايمان بالمرأة والمساواه من يحيى ومحمد الله يرحمه


*انا مش متحيزة والله بس انا بضعف وبدوخ قدام الأطباء


فحاخد من شريف واحمد ويحيى الصفة دى


*من محمد ( واحد تانى) صديقى الاثير الحاضر الغائب اخد

انه بيفهمنى قبل ماافكر قبل ماافهم انا عاوزة ايه اصلا

ومحتوى جنونى جدا وحبه اوى

*من شريف مواهبه الفذة اللى لم ولن ولا يمكن ومستحيل ويالهوى وياخرشتى.....تتكرر


*من شريف انه شايفنى إمرأة مغوية بالخطيئة طول الوقت


*ومن حسام انه حاسس انى إمراة معدية بالحكمة طول الوقت


*من مؤيد انه شايف انى قديسة مثيرة


*من احمد ومؤيد وشريف انى بكون على راحتىىىىىىى اوى فى الكلام

معاهم ....


مش لازم اعمل فيها البنوتة الكلاس لانهم عارفين ده حتى وانا فى قمة سوقيتى


*من شريف انه بياخد قرارات مجنونة فى اى وقت وبينفذها حتى لو ايه


*من عبد الهادى انه بيتحمل ثوراتى وبيعرف يهدينى خالص و بيشيل الليلة لما اتنرفز


*من عبد الهادى طريقة كلام احمد حلمى فى فيلم مطب صناعى لانى بحبها منه اوى

* من عبد الهادى انه شايف انى العفة تمشى على قدمين

*من محمد الله يرحمه جنونه و ثورته على كل تقليدى ورتيب


*من محمد الله يرحمه براءته وطريقة كلامه الطفولية


*من أخو صاحبتى ثقته فى أرائى وانى عقل يمشى على قدمين


*من محمد (غير اللى فاتو) انه بيحسسنى دايما انى

محصلتش ولا ححصل وانى تحفته الصغيرة اللى يشكر الاقدار

كل يوم انه تعرف عليها يوما ما
*** صفات للاسف حاخدها من بنات لانى ملقتش قوتها فى رجال

*من سناء وناريمان خوفهم الحقيقى والصادق عليا


*من ناريمان مخاطرتها عشانى فى موقفين صعبين جدا ووقوفها جبنى فيهم


*من سناء دعمها ليا عاطفيا جدااااااااااااااااااااا ودايما بتحسسنى انى اقوى واجمل واحسن


*احم من سناء انها كانت بتغششنى فى الامتحان وبتذاكرلى قبل الامتحانات وبتعملى براشيم


***نرجع تانى للرجال

Being a great lover * من شريف


being totally understanding women needs * الكاتب احمد العايدى


رغيت كتيييييييييييييييييييييييييير صح؟؟؟؟


بس جبت كلللللللللللللللللل الصفات واغلبها


من ناس فى حياتى انا الشخصية البسيطة


يااااااارب الاقى مسدج من الشخص الاسطورى ده فى الفالنتين الجاى

يارب يارب


ووعد يارب مش حعمل حاجة غلط تانى ولا حزعل حد


هو انا هبلة؟؟؟

حد يعمل حاجة غلط او يكتئب او يزعل حد ومعاه راجل كده؟؟؟


بس ملحوظة رفيعة

انتومش ملاحظين معايا انى اغلب الصفات من شريف؟؟؟


شريف ده نفس السخس اللى انا ضاربة معاه خناقة ( كالعادة) قريب جدا جدا

..................حكمتك يارب

نزار يتحدث عنى

قصيدة عجبتنى وحسيتها بتعبر عنى


محدش يزعل منى

دى لنزار قبانى انا واخداها بالنص

حتى الجمل الاعتراضية منه مش من عندى

اقروها وحسو انى بقولها من معاميق قلبى


والى لقاء اااااخر


%%%%%%%%%%%%%%%%%%%%%%%%











ياسيدى العزيز

هذا خطاب من إمرأة حمقاء

هل كتبت اليك قبلى إمرأة حمقاء؟

إسمى أنا؟؟

دعنا من الاسماء

رانية .. أم زينب

أم هند .. أم هيفاء

أسخف مانحمله ياسيدى الاسماء

***********************


ياسيدى

أخاف ان اقول مالدى من أشياء

أخاف – لو فعلت – أن تحترق السماء

فشرقكم ياسيدى العزيز يصادر الرسائل الزرقاء

يصادر الاحلام من خزائن النساء

يمارس الحجر على عواطف النساء

يستعمل السكين ... والساطور

كى يخاطب النساء

ويذبح الربيع , والاشواق , والضفائر السوداء

وشرقكم ياسيدى العزيز يصنع تاج الشرف الرفيع

من جماجم النساء

*************************

لاتنتقدنى سيدى

إن كان حظى سيئا

فإننى أكتب , والسياف خلف بابى

وخارج الحجرة صوت الريح والكلاب

! ياسيدى

عنترة العبسى خلف بابى

يذبحنى ... اذا رأى خطابى

يقطع رأسى ... اذا رأى الشفاف من ثيابى

يقطع رأسى .... لو أن عبرت عن عذابى

فشرقكم ياسيدى العزيز

يحاصر المرأة بالحراب

وشرقكم, ياسيدى العزيز

يبايع الرجال انبياء ..... ويطمر النساء فى التراب

***************************


لا تنزعج

ياسيدى العزيز ... من سطورى

لا تنزعج

إذا كسرت القمقم المسدود من عصور

إذا نزعت خاتم من رصاص عن ضميرى

إذا انا هربت

من اقبية الحريم فى االقصور

إذا تمردت ...على موتى ... على قبرى .. على جذورى ... والمسلخ الكبير

لا تنزعج ياسيدى

إذا انا كشفت عن شعورى

فالرجل الشرقى لايهتم بالشعر ولا بالشعور

الرجل الشرقى – واغفر جرأتى – لا يفهم المرأة إلا داخل السرير


****************************


معذرة ياسيدى

إذا تطاولت على مملكة الرجال

فالآدب الكبير – طبعا – أدب الرجال

والحب كان دائما من حصة الرجال

والجنس كان دائما مخدرا يباع للرجال

خرافة حرية النساء فى بلادنا

فليس من حرية اخرى .... سوى حرية الرجال

ياسيدى

قل ماتريده عنى فلن أبالى

سطحية؟ غبية؟ مجنونة . بلهاء ؟

فلم أعد أبالى

لان من تكتب عن همومها

فى منطق الرجال .. تدعى إمرأة حمقاء

ألم أقل فى أول الخطاب إنى إمرأة حمقاء ؟

بحبكو جدااااااااااااااااااااااااا

كل اصدقائى اللى بجد بجد بحبهم جدا زى

اهلى ( واللا بلاش اهلى دى) ماهما اللى جايبنى ورا اهلى

وحشتونى جدا


انا البتاع بذات نفسى

طبعا فيه ناس مش حتشوف ده غير متأخر

عشان كنتو فقدتو الامل وبطلتو تدخلو


بس والله وحشتونى جدا

انا حصل حاجات كتيييييييييييييييييييييييييييييييييير

ورفيق دربى فى التدوين مات منى فى نص الطريق

بس انا جيت وحكتب تانى

طبعا مش بنفس كثافة الاول بس حكتب

عشان عندى شحنة غضب وحزن كبيرة اوىىىىىىىىىىىى

يمكن لفترة تشوفونى مختلفة مش مرحة كعادتى

انا اسفة استحملونى انا اللى حصلى مش قليل فى الفترة اللى فاتت


ورجاء كمان


انا مش حقدر ارد على التعليقات بس ارجوكو افضلو علقو

محمد سمير واحمد سمير ودافنشى وعاشور و النظارة

وكل صحابى اللى ربنا يخليهم ليا ارجعو تانى علقو عندى

واستنونى فى بوست قريب