دول مذذكو .؟؟؟؟

الصور دى عندى من مدة

وكنت ناوية اعرضها فى فقرة الصور بتاعتى بس ترددت

يمكن عشان فيه الاهم؟؟

يمكن عشان مش عاوزة اصدم الشوباب اللى بينورونى فى المذذ بتوعهم؟؟

يمكن برضه

المهم اخيرا حعرض لكو صور كام مذة عربى على كام مذة اجنبى قبل وبعد

عشان تعرفو اننا لما نقول انهم مش حلوين

مش بنقولها غيرة ولا حاجة

هه؟؟؟؟؟؟؟ ;-)

أه صحيح مرفق صورة معشوقة الشباب الاولى

باميلا اندرسون من غير ماكياج

وبالمرة بقى

اللى فى الصورة الجماعية مع هيفا على اقصى الشمال باسكال مشعلانى

عيشو ياشوباب مصر :-)

كمان تـــــــــــــــــاج

تاجين مرة واحدة......واحد من غمض عينيك

ونفس الواحد من الاغلبية الصامتة

لا والمصيبة ان غمض عينيك سايبنى اكتشف لوحدى مقليش خالص

وسايبنى لحد ماازوره بالصدفة

!!!!!

ماشى ياعم

هيا بنا نبدأ

اليهم

إلى

غمض عينيك والاغلبية الصامتة

****************

انت مين؟

واحدة من البلد دى .... بحبها وبكرهها

طيبة جدا

رومانسية اوىىىى

بحب أرقص تانجو وأغنى وءأرف الناس عالبلوج

:-)

**************************

مين اكتر 6 اشخاص بتحبهم؟

اممممممم سؤال صعب

بحب أمى اوى

بحب اخواتى ال3

بحب ساسو صاحبتى

ودينا صاحبتى

دول ال6

وفيه كتير تانيين زى جيفارا وفيروز وكاظم

بس انا اظن ان السؤال يقصد الناس الحقيقيين مش الافتراضيين

***************************

أنت سعيد؟؟

لا

****************************

لو اجتمعت انا وحسني مبارك في غرفة واحدة؟

هههههههههههه

حبوسه فى بقه

****************************

لو معاك مليون ونص جنيه......تعمل بيهم ايه؟

اممممممممم

حجيب عربية احدث موديل ومكياج كتير وبارفانات وهدوم

وخصوصا هدوم سواريه عشان بحبها

وحلف العالم

********************************

بتحب مصر؟

جدا......بس بحس انها مبتحبنيش :-(

****************************

بتحبى الشباب؟؟

اممممممم

بحب الولد الشيك

الواثق من نفسه.....الجنتلمان

بيخطف عنيا على طول

ولو واد جامد عارف يعنى ايه

يتعامل مع بنت بيقتلنى طبعا :-)

*****************************

انت مسلم؟

لا مسلمة

ههههههههههههههههه

********************************

ليه؟

هو العادى ان فى مجتماعاتنا محدش بيختار دينه

بس انا اختارته

لما وصلت 12 سنه

قريت كل الديانات

بدون تحيز وقلت اى دين حلاقى نفسى

فيه ححارب عشانه

بس حسيت بنفسى اكتر مع الاسلام

وممكن اكون غلط

بس ده مش حعرفه غير يوم القيامة بقى :-)

*******************************

مين اكتر شخصية ما تقدرش تستغنى عنها في حياتك؟وليه؟

محمد.....ليه؟؟

عشان فاهمنى اوىىىىىىىى

نسيت اقولكو ده اتجوز من 3 اسابيع :-)

*******************************

ايه اكتر موقف محرج اتعرضت ليه في حياتك؟واتصرفت ازاي؟

انا دايما بدى ايحاء انى عيلة

يعنى لو احرجت انا العيلة بتطلع هوا

فالموضوع كله بيقلب هزار حتى لو مع ناس

معرفهمش بيضحكو :-)

*****************************

ايه الأمنية اللي بتدعي ربنا دايما انه يحققها لك؟

انى اكون حد مرموق فى مجالى

والاقى توءم روحى لانه وحشنى اوى رغم انى

لسة معرفوش

*******************************

تمرر التاج ده لمين؟؟؟

اظن انه مر عالكل

على الاقل على الناس اللى احب يتمررلهم

بس زيادة تأكيد احب ادبس التالى اسماؤهم

الديليكون

فنان فقير

أخر من عالم أخر

مايكليتووووو

قاسم أفندى

Alexandrian far away

No Life Without Me

**************************

وجارى تحديث القائمة لاحقا :-)

مقولات متفسرة بنية وحشة ولا مؤاخذة

بمناسبة عودتى بالسلامة

وأنشكاحى بالحياة مش بس لانى رجعت لكو لكن لانى

رجعت أصلا

وده شئ مهم

كفااااااااااااااااارة يابتاع

لولولولولولولوىىىىىىىىىىىىىىى

بهديكو بقى مقولات أبيحة

هو اللى بيقولوها ده شغلهم وبيقولوها بحسن نية

بس تقول ايه فى الاباحة اللى راكبانا؟؟

!!!!!! ومخلينا نفسر كل حاجة غلط

استمتعو بقى :-)

******************


When the DOCTOR says, Take off your clothes.


*********

When the DENTIST says, Open wide.


*********

When the HAIRDRESSER says, Do you want it teased or blown?


*********



When the MILKMAN says, Do you want it in the front or the back?


*********

When the INTERIOR DECORATOR says, Once it's in, you'll love it.


*********

When the SHARE BROKER says, It will rise right up, fluctuate for a while and then slowly fall back again.


*********

When the BANKER says, If you take it out too soon, you'll lose interest .


*********

When the HUNTER says, Goes deep in the bush, shoots twice and always eats what he shoots.


*********

When the TELEPHONE GUY says, Would you like it On the table or against the wall?


*********

حتــــــــــــــــــوحشونىىىىىىىىى

طالعة مصيف

آه طالعة مصيف

بس بينى وبينكو مش عاوزة أروح

لأنى رايحة مع العيلة

وده معناه انى راحة منفى

محدش حيعاكسنى :-(

ولا حعاكس حد :-)

ولا حخرج

بروح أتبضن من الاخر وأرجع

إلهى ينزنق عدوينكو زنقتى

أيام يـــــــــــــــــــــــــــــــــارب تعدى بسرعة جدا

لانى حطق

الصديق العزيز إبراهيم معايا رشح لى شوية كتب

بقوله من مزنقى ده حاضر حاخدهم اقراهم ويارب

يهونو ايام الغربة عليا

حتوحشونى كتيييييييييير كتير

مش حتأخر اسبوع ان شاء الله وحرجع

بس طبعا لكل اللى انا مدمنة مدوناتهم ولكل اللى

بيستظرفو مدونتى

والله نفسى اخدكو كلكو معايا
اهئ اهئ :-(

عموما

كنوع من التذكار لحد مااجى

ححطلكو اغنية جمييييييييلة اوى لمطرب رقيييييييييق اوى

هو المطرب شربـــــــــــل روحــــــــــــــــانا

سبتلكو لينك يعرفكو عليه لكل اللى اول مرة يسمعو شربل

وسبت الكليب ده

يـــــــــــــــــــــــــــــــــــــــــــــــــــــــــــــــارب يعجبكو

عن اللبنانين اللى فى السجون الاسرئيلية او السورية

رسالة متبادلة من سجين وأمه فى عيد الأم

كليب مؤثر على الاقل بالنسبة لى

واللى يحب اغانى اكتر له يقولى بس وانا ارفعهاله
:-)


هو كانت الصديقة عايشة وخلاص حاطة له أغنية فى مدونتها

هى شالتها دلوقتى بس للى فاكرها

كان اسمها لشو التغيير

ايه الرغى ده؟؟؟؟؟

طبعا محدش يستنى انى أرد على التعليقات

بس وعد حرد على واحد واحد لما أرجع :-(

يالا بقى اتفرجو وادعولى ارجع بسرعة..........واكون بكامل اعضائى

مفيش حاجة تتفقع منى هناك :-)

بااااااااااااااى

إنتــــــــــحار شـــــــــاعر

سأنتحر

ومافى ذلك؟؟

يموت المئات كل يوم ومن يبالى؟؟

يموت الأطفال والرجال والنساء

يشق الناس الجيوب ويلطمون الخدود

ونحن جالسون نلهو ونلعب بالنرد لعبة القدر

سأنتحر

ميت يزيد على عدد الاموات فى النشرة

سيقولون

مات أمس 20 فلسطينيا

و15 عراقيا

و17 لبنانيا

و12 جزائريا

آه إنتظروا

..............إنتحر شاعر بالحى المجاور

!!!!!! من يهتم بعد كل هذا

ومن أكون أنا؟؟؟؟

هيا أكتب ياقلمى قبل أن تلقى من الطابق العشرين

أواه ياقلمى العزيز..... ستجرح

لا.....سأذهب عند جارنا العبوس بالطابق الثالث

وألقيك من عنده حتى لا تتأذى

سأطرق بابه و أبتسم رغما عنى

وأقول له

"أريد ان ألقى قلمى من نافذتك "

طبعا سينظر لى فى بلاهة ثم يغلق الباب فى وجهى

عااااااااادى

سأذهب الى الفتاة العانس بالطابق السابع

وأطرق بابها وأتحمل منظر مساحيق غسيـ..... وجهها

وأسبل لها جفونى وأعدها بالزواج بعد أن ألقيك من عندها

تزغرد هى وأهرب انا تاركا إياها تتصل

!!!!! بالخياطة لتفصل لها فستان زفافنا

وأعود إلى شقتى الحبيبة

وأخطط للإنتحار بعد ان تخلصت من القلم

آوووووووه......طعام ثلاجتى ماذا افعل به؟؟؟؟؟

!!!!!!! سيفسد إذا انتحرت وتركته

ماذا أفعل ؟؟

هذه هى اعباء الوزا....أقصد الإنتحار

جارى الاكول بالطابق الخامس عشر

: سألفه له وأطرق بابه وأبتسم له فى تخلف قائلا

طعام فاسد عندى تريده؟؟؟

طبعا سيخطفه منى ويغلق الباب ويتركنى على السلم

عاااااااااااادى

سأعود لشقتى لاستكمال مخططى الماكر

ألا وهو " س133" المعروف بـ " إنتحار شاعر"؟

ينتحر الناس؟؟؟

سؤال سيتردد فى ذهنى كثيرا أثناء تفكيرى

سيهبط عليا الوحى.......... أنبوبة الموقد

وأطير فرحا للمطبخ لاعد العدة

ولكنى سأفاجأ بأنه لا أنبوب لدى

فأنا أعمل بالغاز الطبيعى

" أقصد مطبخى طبعا "

سأفكر بحل أخر

حبل من السقف

فكرة نيرة ستلتمع فى ذهنى

لكنى سرعان ماسأطردها

لان لدى فلسفة وهى لماذا تعذب نفسك قبل الموت؟؟

إطمئن ستتعذب طويلا بعده

رويدك حتى تموت ...لاداعى لان تتعذب مقدما

والشنق سيؤلم رقبتى وربما يجرحها

وهذا ما لا أرضى به قط

الحل الثالث هو........... الاقراص المنومة

علبتان دفعة واحدة وإنتهى الامر

نوم أبدى لذيييييذ

لادماء ولا ظلم ولا كيل بمكيالين

!!! كم هو لذيذ إنتحارى

إنتحار شاعر

ها أنا ذا أعد العدة

لكن إنتظروا

!!! هناك من يطرق بابى

!!ياله من مزعج

ربما يكون شخص يود أن يشاركنى الانتحار؟؟

فألف أهــــــــــــــــــــلا وسهـــــــــــــــــلا

سأفتح وأعود

!!من ؟؟

من هؤلاء؟؟

إلى أين سيأخدونى؟؟

ماذا..؟؟

أية سراية صفراء؟؟

!! يالبــــــــلهكم

ءاتدرون ماذا يقولون؟؟

يقولون إنى مجنونة

وإنى لست شاعرا

بل لست رجلا على الاطلاق

وإننى مجرد طالبة اسمها..........تهذى

!!!

طالبة؟؟

البتاع؟؟ ماهذا الاسم السخيف؟؟

ما هذا الخرف؟؟؟

لاتصدقونهم

إنهم عملاء من العدو

ليمنعونى من إتمام خطتى

خطة إنتــــــــــــــحار شـــــــــــاعر

:تحديث

شكرا جزيلا للصديق أحمد مختار عاشور على تشجعيه لى

على إتخاذ مثل هذه الخطوة ألا وهى نشر بعض من هرتلاتى الشخصية

ديــــــل القــــطة

كل ماتحصل مصيبة فيكى يابلد افتكر مقولة " عمرو اديب" المأثورة

ان في مصر ناس بيبقو ملئ السمع والبصر وماليين الدنيا صريخ وكلام

.........وفجأة

حد يشد الفيشة

كله يقف ويظلم

ويتنسى

حتسألونى ليه بقول كده؟؟؟

اتحبس ايمن نور

قلنا له عاتىىىى

اتحبس كبشة كبيرة كده من قيادات الاخوان

قلنا كخة وحشين وبيغسلو اموال بمسحوق فيه كلور

حبسو طلعت السادات

قلنا متهور واتهم الريس عالهواء انه إتأمر فى قتل الرئيس السادات

حبسو اخوه

محمد انور عصمت السادات

دى بقى وقفت قدامها فترة

عارفين يعنى ايه سلق؟؟؟؟؟؟؟؟؟؟؟؟؟؟؟

بان على أصوله فى جلسة إسقاط عضوية عصمت السادات

سلق بالأوى يعنى

عارفين لما تحصل اخييييييرا

ان سرور
يقول

" موافقون؟؟؟.....أقلية"

بذمتكو حد سمعها منه قبل كده؟؟؟

كله موافقون موافقة

لكن اقلية دى تفصيل عشان عصمت

افلاس وإسقاط عضوية

وعشان يكملو عليه لما حسو انه فيه نفس قضية تزوير متدخلش على عيل بريالة لا مؤاخذة

بوست مكنتش عاوزة اكتبه لانى مش حخش فى تفاصيل

بس لازم ناخد من ده حكمة

محمد فوزى لما قال زمان

اسمع كلام ماما وسيب القطة فى حالها

كان عارف ان يوم زى ده جاى

نصيحة لكل مصرى

لو تطولو........امشو جوة الحيط

اصل جنبه مبقتش امان فى العهد المبارك بتاعنا

وفى كل الظروف

" إبتسم أنت فى أرض الوطن "

يعيش الزعيم الطبيب

والله ماكنت عاوزة

لا بجد مكنتش عاوزة

انا مالى؟؟؟

احشر نفسى ليه فى اللى ماليش فيه؟؟

بس انتو عارفين يموت ال......وصباعة بيلعب

من الاخر مقدرتش

امبارح الموافق 27 مايو غير انه سنوية ابويا تعيشو وتفتكرو

الا انه يوم عادى صحيت عادى متأخر

وبفتح التليفزيون زى اى طالب عنده امتحانات عادى يعنى :-)

ابص الاقيلكو ايه؟؟؟؟؟؟

الاستفتاء على الزعيم المفدى بشار الاسد لفترة رئاسة ثانية

!!!!!!!!!

انا قلت الكلام ده مش غريب على ودانى سمعته فين؟؟ سمعته فين؟؟؟

قعدت اعصر فى نافوخى لحد ماافتكرت انى بسمعه كل يوم فى القناة الاولى :-)

المهم

للى مشافوش الاستفتاء

حعمل بث مباشر من قناة " سورية " لحبايبنا الحلوين اللى مااتفقعتش مرارتهم لسة

اولا

ستوديو شبيه جدا جدا بإستوديو صباح الخير ياشبرا النملة اللى بيجى عالقناة الاولى عندنا

ثانيا

مذيعة شبة مذيعاتنا برضه

ثالثا

صورة بشار بعرض الحيطة مع شعار كبير تحتها

"منحــــــــــــــــــــــــــــــــــــــــــــــــــــــــــبك "

الكلام بقى

على أصالة الزعيم المفدى

وحلاوة الزعيم المفدى

وجمال الزعيم المفدى

وبث مباشر من مقر الانتخاب فى دمشق

فين ياولاد؟؟؟؟؟؟

طبعا فى كلية طب

مش هو متخرج منها؟؟؟

ورجاء بقى للمواطنين اللى حيطرشقو سعادة بالتزام قواعد المرور

والامان

وبناءا على طلب الجماهير تم مد مواعيد الاقتراع حتى العاشرة مساءا

عشان كله يقرع

ومحدش يبات نفسه فى تقريعة

بس نرجو

وعدم اطلاق نار فى طهور....قصدى استفتاء الزعيم

"واللى يحبنا ميضربش نار فى فرحنا "

وهو السيدة عديلته ( دى غير عديلة بتاعت بخيت ) رايحين يستفتو

لا وايه؟؟؟؟

اللى يفقع بقى

ان مجلس الشعب بتاعهم بيؤيد اعادة ترشيح السيد بشار مرشحا ( اوحد ) للرئاسة

!!!!!!!!!!!!!!!!!

كــــــــــــــــــــــحك

لامؤاخذة

هو اللى شاف بلوة غيره هانت عليه بلوته اه

بس تخيلو معايا لو نزار قبانى كان عايش

كان حيقول ايه؟؟؟

كانت قصيدته فى المناسبة الميمونة جدا دى حتبقى ايه؟؟؟

...............................................................

وده بيؤكد ايه ياجماعة؟؟؟؟

ان فعلا احنا والاخوة السوريين تجمعنا اواصل الاخوة

وعبد الناصر كان عنده حق لما عمل الجمهورية العربية المتحدة مع سوريا

ده احنا طوبة واتقسمت نصين ياربى؟؟؟؟؟؟

بس بجد

من مزنقى هذا احب اقول

ميرسى كتير لقناة سورية على اليوم المفتوح امبارح

وياريت فعلا يزودو من جرعة الكوميديا فى برامجهم

أولادى وبناتى مشاهدى هذة المدونة

كنا مع بعض بنتفرج على اخر اصدارات الدراما السورية

مع وعد بتقديم كل ماهو جديد

وإلى اللـــــــــــــقاء

صور بـــــدون تعليق

ورحمة أبويا ماحاعلق بحرف عالصور دى

يبقى انت اكيــــــــــــــــــــد فى مصر

يخرب بيت دى بلد

:: تحديث

الصديق حنتكلم بعتلى التحديث ده

يوجع القلب جدا والاخ اشرف حمدى حاطط واحد شبهه

بس انا قلت على رأى حنتكلم فعلا

بجملة النكد يعنى

إقرا و مخمخ

You can dance-every dance with the
guy

Who gives you the eye,let him hold you tight

You can smile-every smile for the man

Who held your hand neath the candle light

But don't forget who's takin' you home

And in whose arms you're gonna be

So darlin' save the last dance for me


Oh I know that the musics fine

Like sparklin' wine,go and have your fun

Laugh and sing,but while we're apart

Don't give your heart to anyone

But don't forget who's takin' you home

And in whose arms you're gonna be

So darlin' save the last dance for me

Baby don't you know I love you so

Can't you feel it when we touch

I will never never let you go

I love you oh so much


You can dance,go and carry on

Till the night is gone

And it's time to go

If he asks if you're all alone

Can he take you home,you must tell him no

'Cause don't forget who's taking you home

And in whose arms you're gonna be

So darling,save the last dance for me


'Cause don't forget who's taking you home

And in whose arms you're gonna be

So darling,save the last dance for me

Save the last dance for me

Save the last dance for me.


أغنية بعشقها لمايكل بوبليه

بجد فنان مختلف

أغانيه مختلفة جدا ساعات تسمعه تحس انك بتسمع فرانك سيناترا

وساعات تحس انه حديث جدا

بس الاكيد ان كلماته مبهرة

بدليل اقروا الكلمات دى

wedding date واللى اتفرج على فيلم

حيكون عارفها

sound track لانها كانت ال

بتاع الفيلم عموما بجد مطرب فظيع وللى عارفه او لأ

انا حطه الموقع بتاعه عليه اتحف اغانية الجديدة منهم رائعة

me & mrs.Jones

هو الموقع مش بينزل اغانى بس عاملين بلاى ليست

يعنى لو اسنيت حتسمع الاغنية دى اكيد

اسمعو وادعولى

تـــــــــــــــــــــــــــــــاج

تاج من الصديق العزيز النظارة السودة

ميرسى كتير رغم انى مكنتش احب ان اول تعارفنا يبقى مزانق كده :-)
-----------------------------------
أحب شخص لقلبك فى الدنيا؟

حتى الان........أنــــــــــــــا

---------------------------

انسان مستعد تضحي بحياتك – ركز فى كلمة حياتك - عشانه؟

الانسان اللى حديله قلبى طبعا متغلاش عليه حياتى خالص

--------------------------

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

كل حد غبى او ديكتاتور او مدعى...او حاول يقيد حريتى

-----------------------------

ما هو:اسم أجمل كتاب كتبه بشر قرأته ومحتفظ به حتى الان؟

الاعمال الكاملة لنزار ( التسع مجلدات الضخام دول)بموت فيها

------------------------------

اسم كتاب -كتبه بشر برضة- انت متعلق بيه وبتقرأه كل فترة؟

نفس المجلدات دى بقراها واعيط او ادوخ حسب المود بس لازم مع شيكولاتة

--------------------------------

اهم جهاز منزلى انت متعلق بيه او بتستخدمه كتير؟

الكمبيوتر

-----------------------------

مكان تحس بالراحة عندما تدخله؟

سيلانترو كافيه اى فرع وخصوصا فرع نايل سيتى

--------------------------------

شىء تحس بالراحة النفسية عندما تنظر اليه؟

صور ميكى وبطوط وعم دهب حبيبى

------------------------------

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

ساقية الصاوى

---------------------------

اجمل مدينة زرتها داخل مصر ؟

اسكندرية

-----------------------

أجمل مكان طبيعي رأيته داخل مصر ؟

إمتزاج النيل فى البحر الابيض فى رأس البر

------------------------

شخصية كارتونية بتحبها؟

عم دهب

-------------------------

نوع هاتفك المحمول؟

نوكيا 6260

----------------------------

سرعة بروسيسور جهازك؟

3.06 GHZ

------------------------

حجم ذاكرة –هارد- جهازك؟

80

---------------------------

المساحة التى تشغلها المواد الاسلامية على جهازك؟

480 MB

-----------------------------

نفس المساحة السالف ذكرها فى قلبك -الاجابة لنفسك عشان الرياء يا اخواننا -؟

طالما لنفسى مش حجاوب

ثم انا مساحة قلبى مش بتتقاس بالميجا بايت ;-)

-----------------------------

أهم هدف انت واضعه لحياتك الآن؟

اتخرج كمان شهر واشتغل شغل ابقى مهمة فيه وأدى بجد

وأقبل فى السلك الديبلوماسى..

وحلمى القديم انى ابقى محافظ البنك المركزى .. والاقى حب حياتى..

واتجوزه واخليه اسعد حد فى الكون

------------------------------

مواصفات فتى الأحلام بالنسبة لك؟

هههههههه

السؤال ده كنت لسة بتسأله النهاردة من واحدة جايبالى عريس

بص

يكون مثقف

متفتح

مش حمار بتاع انا شرقى وانتى بنت وانا ولد

بس يكون شرقى بيغير عليا

يعنى.......يحمينى حتى اخر قطرة فى دمه

وفى نفس الوقت حنين حتى النخاع

ويتقبلنى زى ماانا ((ويعشق تفاصيلى)) و

يتحمل مسئوليتى من غير مايقولى انه متحملها

يحسسنى انى طفلة من غير مايهين ذكائى ولا

استقلاليتى

يكون عنده لسان نزار واحاسيسه

ورجوله رشدى اباظة فى فيلم " صغيرة على الحب" يحسسنى

دايما انى صغيرته وسيدته وملكة قلبه

ويكون امور طبعا

انا مقلتهاش فى الاول دى؟

----------------------------

صف ما يأتى:شعورك لما بتسمع كلمة مصر ؟

ساقطة ترفض التقويم

----------------------

شعورك لما بتسمع كلام عن اليهود؟

خنازير لكن اذكيا ومنظمين ومتحدين

وبيحبو بلدهم اوىى

-----------------------

شعورك لما بتشوف ظابط شرطة؟

عاوزة اخنقه حتى لومعمليش حاجة

عندى قناعة انه اكيد آذى غيرى

-------------------------

شعورك لما بتشوف الكناس العجوز فى الطريق؟

ان ياريته كان اتولد ايرلندى والا امريكى

لان ده مش آآآآدمىىى خالص

وبدمع

--------------------------

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

بحس الاسلام مش كده الاسلام أسهل وأعقد من كده

أعقد لانه مش مظهر خالص مكنش حد غلب

الدين المعاملة

وأسهل لان دينا سهل اوى وجمييييييل اوى

بس للاسف عاوز مخ

وهو كده؟؟؟

لاغى مخه خالص

-----------------------------

احساس يراودك فى اشارة مرور مغلقة بسبب مسئول كبير؟

ببقى عاوزة اروح اجيبه من صلعته احط راسه فى تواليت عمومى مش متنضف

وطالما عمومى اكيد حيبقى مش متنضف :-)

حتى لو اكبر صلعة فى البلد قصدى اكبر راس :-)

----------------------------------

امرر التاج لمين لمين؟؟؟

بقايا قلب ووطن

كاريكاتووز

فنان فقير

no life without me

حنتكلم

قاسم افندى

حكاوى

دول اللى جم على بالى دلوقتى

بس اظن انى كل مايجى على بالى حد قبل مااعمل بوست جديد حمررهوله

لا انا سادية جدا فى المواضيع دى :-)