يعيش الزعيم الطبيب

والله ماكنت عاوزة

لا بجد مكنتش عاوزة

انا مالى؟؟؟

احشر نفسى ليه فى اللى ماليش فيه؟؟

بس انتو عارفين يموت ال......وصباعة بيلعب

من الاخر مقدرتش

امبارح الموافق 27 مايو غير انه سنوية ابويا تعيشو وتفتكرو

الا انه يوم عادى صحيت عادى متأخر

وبفتح التليفزيون زى اى طالب عنده امتحانات عادى يعنى :-)

ابص الاقيلكو ايه؟؟؟؟؟؟

الاستفتاء على الزعيم المفدى بشار الاسد لفترة رئاسة ثانية

!!!!!!!!!

انا قلت الكلام ده مش غريب على ودانى سمعته فين؟؟ سمعته فين؟؟؟

قعدت اعصر فى نافوخى لحد ماافتكرت انى بسمعه كل يوم فى القناة الاولى :-)

المهم

للى مشافوش الاستفتاء

حعمل بث مباشر من قناة " سورية " لحبايبنا الحلوين اللى مااتفقعتش مرارتهم لسة

اولا

ستوديو شبيه جدا جدا بإستوديو صباح الخير ياشبرا النملة اللى بيجى عالقناة الاولى عندنا

ثانيا

مذيعة شبة مذيعاتنا برضه

ثالثا

صورة بشار بعرض الحيطة مع شعار كبير تحتها

"منحــــــــــــــــــــــــــــــــــــــــــــــــــــــــــبك "

الكلام بقى

على أصالة الزعيم المفدى

وحلاوة الزعيم المفدى

وجمال الزعيم المفدى

وبث مباشر من مقر الانتخاب فى دمشق

فين ياولاد؟؟؟؟؟؟

طبعا فى كلية طب

مش هو متخرج منها؟؟؟

ورجاء بقى للمواطنين اللى حيطرشقو سعادة بالتزام قواعد المرور

والامان

وبناءا على طلب الجماهير تم مد مواعيد الاقتراع حتى العاشرة مساءا

عشان كله يقرع

ومحدش يبات نفسه فى تقريعة

بس نرجو

وعدم اطلاق نار فى طهور....قصدى استفتاء الزعيم

"واللى يحبنا ميضربش نار فى فرحنا "

وهو السيدة عديلته ( دى غير عديلة بتاعت بخيت ) رايحين يستفتو

لا وايه؟؟؟؟

اللى يفقع بقى

ان مجلس الشعب بتاعهم بيؤيد اعادة ترشيح السيد بشار مرشحا ( اوحد ) للرئاسة

!!!!!!!!!!!!!!!!!

كــــــــــــــــــــــحك

لامؤاخذة

هو اللى شاف بلوة غيره هانت عليه بلوته اه

بس تخيلو معايا لو نزار قبانى كان عايش

كان حيقول ايه؟؟؟

كانت قصيدته فى المناسبة الميمونة جدا دى حتبقى ايه؟؟؟

...............................................................

وده بيؤكد ايه ياجماعة؟؟؟؟

ان فعلا احنا والاخوة السوريين تجمعنا اواصل الاخوة

وعبد الناصر كان عنده حق لما عمل الجمهورية العربية المتحدة مع سوريا

ده احنا طوبة واتقسمت نصين ياربى؟؟؟؟؟؟

بس بجد

من مزنقى هذا احب اقول

ميرسى كتير لقناة سورية على اليوم المفتوح امبارح

وياريت فعلا يزودو من جرعة الكوميديا فى برامجهم

أولادى وبناتى مشاهدى هذة المدونة

كنا مع بعض بنتفرج على اخر اصدارات الدراما السورية

مع وعد بتقديم كل ماهو جديد

وإلى اللـــــــــــــقاء

صور بـــــدون تعليق

ورحمة أبويا ماحاعلق بحرف عالصور دى

يبقى انت اكيــــــــــــــــــــد فى مصر

يخرب بيت دى بلد

:: تحديث

الصديق حنتكلم بعتلى التحديث ده

يوجع القلب جدا والاخ اشرف حمدى حاطط واحد شبهه

بس انا قلت على رأى حنتكلم فعلا

بجملة النكد يعنى

إقرا و مخمخ

You can dance-every dance with the
guy

Who gives you the eye,let him hold you tight

You can smile-every smile for the man

Who held your hand neath the candle light

But don't forget who's takin' you home

And in whose arms you're gonna be

So darlin' save the last dance for me


Oh I know that the musics fine

Like sparklin' wine,go and have your fun

Laugh and sing,but while we're apart

Don't give your heart to anyone

But don't forget who's takin' you home

And in whose arms you're gonna be

So darlin' save the last dance for me

Baby don't you know I love you so

Can't you feel it when we touch

I will never never let you go

I love you oh so much


You can dance,go and carry on

Till the night is gone

And it's time to go

If he asks if you're all alone

Can he take you home,you must tell him no

'Cause don't forget who's taking you home

And in whose arms you're gonna be

So darling,save the last dance for me


'Cause don't forget who's taking you home

And in whose arms you're gonna be

So darling,save the last dance for me

Save the last dance for me

Save the last dance for me.


أغنية بعشقها لمايكل بوبليه

بجد فنان مختلف

أغانيه مختلفة جدا ساعات تسمعه تحس انك بتسمع فرانك سيناترا

وساعات تحس انه حديث جدا

بس الاكيد ان كلماته مبهرة

بدليل اقروا الكلمات دى

wedding date واللى اتفرج على فيلم

حيكون عارفها

sound track لانها كانت ال

بتاع الفيلم عموما بجد مطرب فظيع وللى عارفه او لأ

انا حطه الموقع بتاعه عليه اتحف اغانية الجديدة منهم رائعة

me & mrs.Jones

هو الموقع مش بينزل اغانى بس عاملين بلاى ليست

يعنى لو اسنيت حتسمع الاغنية دى اكيد

اسمعو وادعولى

تـــــــــــــــــــــــــــــــاج

تاج من الصديق العزيز النظارة السودة

ميرسى كتير رغم انى مكنتش احب ان اول تعارفنا يبقى مزانق كده :-)
-----------------------------------
أحب شخص لقلبك فى الدنيا؟

حتى الان........أنــــــــــــــا

---------------------------

انسان مستعد تضحي بحياتك – ركز فى كلمة حياتك - عشانه؟

الانسان اللى حديله قلبى طبعا متغلاش عليه حياتى خالص

--------------------------

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

كل حد غبى او ديكتاتور او مدعى...او حاول يقيد حريتى

-----------------------------

ما هو:اسم أجمل كتاب كتبه بشر قرأته ومحتفظ به حتى الان؟

الاعمال الكاملة لنزار ( التسع مجلدات الضخام دول)بموت فيها

------------------------------

اسم كتاب -كتبه بشر برضة- انت متعلق بيه وبتقرأه كل فترة؟

نفس المجلدات دى بقراها واعيط او ادوخ حسب المود بس لازم مع شيكولاتة

--------------------------------

اهم جهاز منزلى انت متعلق بيه او بتستخدمه كتير؟

الكمبيوتر

-----------------------------

مكان تحس بالراحة عندما تدخله؟

سيلانترو كافيه اى فرع وخصوصا فرع نايل سيتى

--------------------------------

شىء تحس بالراحة النفسية عندما تنظر اليه؟

صور ميكى وبطوط وعم دهب حبيبى

------------------------------

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

ساقية الصاوى

---------------------------

اجمل مدينة زرتها داخل مصر ؟

اسكندرية

-----------------------

أجمل مكان طبيعي رأيته داخل مصر ؟

إمتزاج النيل فى البحر الابيض فى رأس البر

------------------------

شخصية كارتونية بتحبها؟

عم دهب

-------------------------

نوع هاتفك المحمول؟

نوكيا 6260

----------------------------

سرعة بروسيسور جهازك؟

3.06 GHZ

------------------------

حجم ذاكرة –هارد- جهازك؟

80

---------------------------

المساحة التى تشغلها المواد الاسلامية على جهازك؟

480 MB

-----------------------------

نفس المساحة السالف ذكرها فى قلبك -الاجابة لنفسك عشان الرياء يا اخواننا -؟

طالما لنفسى مش حجاوب

ثم انا مساحة قلبى مش بتتقاس بالميجا بايت ;-)

-----------------------------

أهم هدف انت واضعه لحياتك الآن؟

اتخرج كمان شهر واشتغل شغل ابقى مهمة فيه وأدى بجد

وأقبل فى السلك الديبلوماسى..

وحلمى القديم انى ابقى محافظ البنك المركزى .. والاقى حب حياتى..

واتجوزه واخليه اسعد حد فى الكون

------------------------------

مواصفات فتى الأحلام بالنسبة لك؟

هههههههه

السؤال ده كنت لسة بتسأله النهاردة من واحدة جايبالى عريس

بص

يكون مثقف

متفتح

مش حمار بتاع انا شرقى وانتى بنت وانا ولد

بس يكون شرقى بيغير عليا

يعنى.......يحمينى حتى اخر قطرة فى دمه

وفى نفس الوقت حنين حتى النخاع

ويتقبلنى زى ماانا ((ويعشق تفاصيلى)) و

يتحمل مسئوليتى من غير مايقولى انه متحملها

يحسسنى انى طفلة من غير مايهين ذكائى ولا

استقلاليتى

يكون عنده لسان نزار واحاسيسه

ورجوله رشدى اباظة فى فيلم " صغيرة على الحب" يحسسنى

دايما انى صغيرته وسيدته وملكة قلبه

ويكون امور طبعا

انا مقلتهاش فى الاول دى؟

----------------------------

صف ما يأتى:شعورك لما بتسمع كلمة مصر ؟

ساقطة ترفض التقويم

----------------------

شعورك لما بتسمع كلام عن اليهود؟

خنازير لكن اذكيا ومنظمين ومتحدين

وبيحبو بلدهم اوىى

-----------------------

شعورك لما بتشوف ظابط شرطة؟

عاوزة اخنقه حتى لومعمليش حاجة

عندى قناعة انه اكيد آذى غيرى

-------------------------

شعورك لما بتشوف الكناس العجوز فى الطريق؟

ان ياريته كان اتولد ايرلندى والا امريكى

لان ده مش آآآآدمىىى خالص

وبدمع

--------------------------

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

بحس الاسلام مش كده الاسلام أسهل وأعقد من كده

أعقد لانه مش مظهر خالص مكنش حد غلب

الدين المعاملة

وأسهل لان دينا سهل اوى وجمييييييل اوى

بس للاسف عاوز مخ

وهو كده؟؟؟

لاغى مخه خالص

-----------------------------

احساس يراودك فى اشارة مرور مغلقة بسبب مسئول كبير؟

ببقى عاوزة اروح اجيبه من صلعته احط راسه فى تواليت عمومى مش متنضف

وطالما عمومى اكيد حيبقى مش متنضف :-)

حتى لو اكبر صلعة فى البلد قصدى اكبر راس :-)

----------------------------------

امرر التاج لمين لمين؟؟؟

بقايا قلب ووطن

كاريكاتووز

فنان فقير

no life without me

حنتكلم

قاسم افندى

حكاوى

دول اللى جم على بالى دلوقتى

بس اظن انى كل مايجى على بالى حد قبل مااعمل بوست جديد حمررهوله

لا انا سادية جدا فى المواضيع دى :-)

إلى صديقى النفسى

سيدى اعرف انك ان وقعت عيناك على تلك السطور ستعرفنى

ستعرفنى بالاسم

ستتذكر ايام صداقتنا

دعنا نسميها صداقتنا

لم أذكرك بالسوء حينها

ولن افعل
لماذا؟

حقا لا اعلم

كنت تقول لى ان صوتى حين اغنى تغريد من الجنة

كنت تخجلنى

كنت تداعب فيا مشاعر الانثى

كنت تعلمنى اكثر منى

كنت تقرؤنى
................
كان كلامك معى عنى يفوق الواقع والمعقول

يحملنى معه الى اللا مكان

مهما تكلمت اوحكيت او وصفت كلامك معى لن اكون دقيقة

وكنت أذوب انا مع كل حرف منك

ولكن هل توهمت انت انى احببتك؟

...............................

عندما كنت ارسل لك خواطرى كنت تبالغ فى مدحى

ورقة احساسى و....الخ الخ

ولكم همست لى كلام جميلا عن كتاباتى

وغنائى وشكلى

كنت تصفنى كوصف الهة لا بشر


وكان كلامك كالخمر بأذنى

.....................

هل تذكر حين قلت لك انى مكتئبة وعلى حافة الهاوية
!!!!!!!!!!

هل تذكر كلمة انا صديقك النفسى؟؟

ومن يومها نصبت نفسك كاهن اعترافاتى

فى جعبتك احط اسرارى

وفجأة
تررن تررن

- الو...

ازيك؟؟

- الحمد لله انتى اخبارك ايه؟

-انا كويسة بس وحشتنى بجد

واللا الكتابة والنشر خدوك مننا؟؟

-لالالا خالص انا موجود

- ماشى ياعم الفنان بس بجد قلقتنى اليومين اللى فاتو

- لا ماانا مش حقلقك تانى

-........!!!!!!!!

- اصل احنا اخر مرة نتكلم


- .............

ليه؟

انا زعلتك؟

- لا طبعا

بس كفاية كده

- اه طيب

- اشوفلى صديق نفسى تانى يعنى؟؟؟

-............

- عموما خلى بالك من نفسك

وربنا يسامحك

- انتى بليز خلى بالك من نفسك اوى

-.....................


وانتهت اخر مكالماتنا

هل انت راض عن نفسك الان؟؟

هل انت الان فى صفوف العباقرة؟

لا يلقون بالا للبعد الانسانى الا على الورق حين يكتبون؟؟

لقد افتقدتك

حقا
ولكنى رغم مرور ثمانية أشهر على هذا الحوار

ومع اقتراب مرور عامين على بداية تعارفنا

مازلت لست غاضبة منك

حتى عندما رأيتك فى تلك الندوة

عندما لم اتكلم معك كان لانى ...........لا اعلم لماذا

لكنى مؤكد كان عندى سبب وجيه لعدم اعارتك اهتماما

ثم.............من اكون انا فى عالمك الواسع الزخم؟؟

مجرد اخرى؟؟؟؟؟؟؟؟؟

حقا لااعلم

ولا يهمنى الان ان اعلم

فقط لو قدر لك ان تقرأ سطورى ان أذكرنى

يا من كنت يوما ........ صديقى النفسى

والنبى والنبى

ياذوى القلوب الرحيمة

يا كل من دخل مدونتى وابتسم بس مش ضحك حتى

والنبى والنبى لو ليا ذرة غلاوة عندكو

النهاردة حفلة على الحجار فى ساقية الصاوى وفى الغالب مش حعرف اروح

والنبى طلب بسييط

حد يقوله تتر ابلة فضيلة اللى بصوته هو وعزة كمال الاقيه فييييين؟؟

حمووووووت عليه بجد

يا يغنيه وحد يسجله ويبعتهولى

يايقول فين الاقيه
!!!!!!!!

يـــــــــــــــــــــــــــارب يكفيكو شر المرض

تحديث: والله والله والله دى اقدم من ياولاد ياولاد

دى مبتجيش من 17 سنة
اهئ اهئ اهئ

رجابيات

********
أنا الموقع أدناه أنتمى إلى أمة أمجاد ياعرب أمجاد

وأرغب فى أقدم استقالتى من هذه العروبة

لأسباب صحية ومرفق الشهادات الطبية عن الاصابة

بضغط الدم والاكتئاب واللطم اللارادى

.....................
********
اقترح البعض تغيير اسم الجامعة العربية إلى "بيت

العرب " لانه اسم يوحى بالارتباط الاسرى والعزوة

إقترح آخرون تعديل الاسم الى

" بيت الإخوة العرب "

وهو اقتراح طيب


لكنه يحتاج إلى تعديل بسيط ليصبح


" بيت الاخوة كارمازوف"




من ارشيف نص كلمة للعظيم

" أحمد رجب"

بعض ماحدث فى 48 ساعة

يومين عدوا مكتبتش حاجة
يومين بس والله
.....................

بس ايه حصل فيهم؟؟
1- وقعت طيارة مراقبة فى سينا ومات بتاع 9 او 10 من فرنسا وكندا

2- ساركوزى فاز فى الانتخابات ودى مصيبة

3- اضراب عمال النقل العام والضرب اللى كلوه

4- مجلس الشعب وافق على رفع سن التقاعد للقضاة

ل سبعين سنة خلاص


اقل من 48 ساعة والله

حصل فيها كل المصايب دى؟؟؟

وللعلم انا ده عرفته وانا نايمة طول الايام والله ماشفت ولا نشرة

ولا قريت جرنان

ده من البرامج العادية والتلقيط من النت

بس

امل لو كنت اتفرجت كنت لقيت ايه؟؟؟

لا تعليق

,, سيدى رئيس الحكومة"

............لقد قلت انك تعمل لدينا,, لذا

"انت مقال

جزء من خطاب مواطن اسرائيلى

فى المظاهرات المطالبة باستقالة اولمرت

مصر اليوم فى عيد

مش حكتب اى بوست

لانى من فرحتى مش مشغلة غير اغنية شادية


" يالى من البحيرة

وياللى من اهل الصعيد



ياللى من العريش الحرة او من بورسعيد



الباشا فرحه النهاردة


وابوة عيد ميلاده


ومصر اليوم فى عيد

هييييييه

مصر اليوم فى عيد

الله"

بس خلاص

تايم أووفر

النهاردة دخلة الباشا





لولولولولولىىىىىىىى





مبروك ياأم عيلاء ياحبيبتى



عقبال يارب مايجيبلك حكام صغنونين تلعبى معاهم





ولو انى خايفة الواد ميرفعش راسنا الليلة دى :-(





( وبهذه المناسبة ( الميمونة





ححط زيي زى اغلب المدونين الكارت الشيك اللى عملناهوله




عشان يعرف بس معزته فى قلوبنا





آه والله





الا صحيح ياأختى ...... هى الولية كوندى نقططته قبل ماتمشى؟؟؟




يووه


كنت حنسى



كل سنة والبأف الكبير طيب



ويجعله عامر


لولولولولولولولولىىىى

تايمر

باقى من الزمن يوم على دخلة سعادة الباشا

نأسف لقطع الارسال

رغم انى كنت واخدة عهد انى ارحمكو منى شوية بس اعمل ايه؟


الاحداث عاوزانى أأرفكو

كلنا عرفنا ان مرتضى منصور اترزع 3 سنين
سجن

وده الحد الاقصى للعقوبة اللى محدش كان متصوره

بس فيه تحذير هام ياجماعة

الحاج المستشار نوفل
ضم من ضمن حيثيات ادعائه ان مرتضى منصور سبه وقذفه

ازاى يامعلم؟؟

" قال " حسبى الله ونعم الوكيل

دى تعتبر سب وقذف؟؟


ياحلاوة
ده انا على كده حرفع قواضى على كلللللللللل الناس

اولهم الولية امى

تايمر

باقى من الزمن يومين على دخلة سعادة الباشا

مش عارفة ايه هسس البوستينج اللى انا فيه النهاردة
!!!!!!!!!!!!!!
قال يعنى كأن البوستينج حيتمنع مثلا
!!!!!!!!!

الفضا يعمل اكتر من كده
مع ان امتحاناتى كمان اسبوعين تقريبا :-)
المهم ان البوست ده غلس لانه نداء لذوى القلوب الرحيمة
.............
أرجوكم الكيف بيذل ياجماعة


حموت على تتر ابلة فضيلة القدييييم بتاع على الحجار وعزة كمال
مش بتاع ياولاد ياولاد ده
وبجملة الطمع الطفولى نفسى فى حد يدلنى على اغانى محمد ضياء ونسرين بتاعت الاطفال
والنبى والنبى

اللى يعرف اى معلومات يقولى لانى بفرك على الحاجات دى من فترة وخلاص بقى
خلاص خلاص يعنى
..................


وهنيالك يافاعل الخير والثواب عند الله

ياقذايفك ياقذافى

استكمالا للى كان نشره الاخ العزيز حنتكلم واضح ان القذافى مش ناوى
يسمع بنصيحتى ويغير الحشيش المضروب اللى بيضربه


طالع اهه بخازوق جديد
ألا وهو

ايطاليا اغلبها من أصول ليبية,, لذا أيها السادة حلولهم "
DNA لكى نتأكد "

كل ده ليه؟؟؟

عشان 5000 ليبى اتخطفو سنة 1911 واترحلو على روما
وطبعا طبعا
الطوليان أول ماشافوهم اتهبلو راحو نايمين معاهم كلهم

ومن هنا جاءت ايطاليا
!!!!!!!!!!!!!!!

حد يسكت الجدع ده ياجدعان

تايمر

باقى من الزمن 3 ايام على دخلة سعادة الباشا

أشرف حمدى جه عالوجيعة

رسام الكاريكاتير \ أشرف حمدى واللى بالمرة حسب كلامه بيعالج سنان البنى آدمين

عمل حته بوست
مع واحد من اهم معيناتى على الحياة

د \ أحمد خالد توفيق

بجد ميرسى على الخدمة الغير مقصودة دى ياعم أشرف
ولينك البوست اهه للى يحب يشوفه
http://caricatooz.blogspot.com/2007/04/blog-post_23.html