Wednesday, May 7, 2008

عن أحمد رشدى

كتير منا مايعرفوش احمد رشدى او يعرفوه

وناسيينه او مهتموش يعرفوه

اللواء احمد رشدى وزير داخلية مصر فى منتصف الثمانينات

يعنى فى الايام المباركة والعهد المبارك

سوف اذكر لكم موقفا له بس عشان تعرفو

ان وزارة الداخلية مش كل

تاريخها اسود من ايام سجن الاجانب لحد النهاردة والاعتقالات

وان كان ليها فترة كانت وزارة محترمة بوزير محترم

المكان: ميدان روكسى

الزمان : ظهيرة احد الايام

الحدث: ضابط شرطة ماشى بعربيته فى الميدان والاشارة حمرا

لكن لانه ضابط كسرها ومشى

قام عسكرى المرور كتب له مخالفة

الضابط شافه بيكتب مخالفة لف ورجعلة وشاروله

عالبيريه الميرى اللى عالكبوت

وقاله : انت مش شايف ده ياابن الكلب؟؟؟؟ وقام رزعه قلم على وشه

لجل حظه ميدان روكسى يقع فيه بيت مين؟؟؟

السيد احمد رشدى وزير الداخلية وقتها

قبل ما الموقف ده يخلص الميدان شهد الاتى

السيد الوزير بنفسه فى وسط الميدان بالبيجامة الكستور

اه والله

ماهو حظه ان الوزير شاف الموقف من بلكونته

نزل الوزير ووقف عربية الضابط

وقاله : انت بتتعدى على موظف اثناء تأدية عمله ياابن الكلب؟؟؟

وقام رازعه نفس القلم اللى كان هو لسه مديه للعسكرى

وقاله : حالا تسلم رتبتك انت متحول للتحقيق

وابقى قابلنى لو خدت لرتبه دى تانى

** الموقف ده يحفظه التاريخ لذلك الرجل العظيم

اللى ممكن ابقى احكيلكو عنه تانى بعد كده

واللى ( غار) منه النظام لحب الناس له فمشوه

ونكبونا بزكى بدر صاحب معارك المخدرات الشهيرة

مش عارفة انا حكيت الموقف ده ليه؟؟؟

واشمعنى دلوقتى فى ظل غلا بنزين ولغى قانون مرور

واعتقالات واضرابات واعتقالات تانى .. يمكن عشان بتحسر على الشرفاء

فى بلدنا ومدة وجودهم فى المناصب ؟؟؟

11 comments:

AHMED SAMIR said...

لا يا ستي...عارفينه وحافظينه
احمد رشدي..رجل محترم والتاريخ يشهد بذلك
ويكفي ان مافيا المخدرات كانت هي السبب في اقالته
المهم بقى
انتي بتغطسي فين وتقبي فجأة
على فكرة
الحياة مش مستاهلة..ابسط من كدة بكتيــــــــــــــــــــــر
تحياتي

.:.-=- ELGaZaLy-=-.:. said...

انا ساكن فى مصر الجديدة...

تعرفى ان الراجل دة كان بينزل الميدان بالجلابية..

يكلم الناس بمنتهى الادب؟؟

وكان بينزل لؤات الشرطة فى الشوارع ودة الى خنق منه ناس كتير

بصى الشرطة فيها كتير اوى نضاف اوى

بس مش ممكن يطلعو زى الجيش كدة

ابو غزالة لحد النهاردة معروف هو مين

كمال الجنزورى

حسب الله الكفراوى

فى مليون لا ملاايين الكوادر النضيفة بس راس السمكة...

فهمانى!

سكوت هنصوت said...

يااااااااه

انا جيت عندك وانا بقامر اني هلاقيكي ولا لأ

و فضلت انزل لحد اما عرفت الي حصل و وفاة صديقك

البقاء لله وعزائي مقدما

و نورت الشاشة التدوينية يا بتاع

أخيرا بقى...احمد رشدي فعلا كان راجل محترم عشان كده ما عمرش

يا ترى حد عارف هو فين دلوقتي

لو حد يعرف يجيبهولنا و نشوفه و نعمل معاه لقاء هيبقى لطيف قوي

الشرفاء في بلادنا ما بيستمروش....ببساطة لإن البيئة كلها فاسدة

تحياتي للبتاع وعود احمد

حدوته مصرية said...

جميل جدا احمد رشدى
واضح ان كلكم عارفينه الا انا
شكرا يا بتاع على المعلومة و اكيد كان فى زيه كتير

تحياتى

البتاع said...

A.SAMIR


هههههههههههههه
يادى النيلة عليا وعلى سنينى السودة

انا جبت سيرتى قى البوست؟؟؟
بتفكرنى بيا ليه بس يادودو؟؟؟

انت اخبارك ايه؟؟
صحيح
هو فيه حد كتب عنك حاجة فى الدستور او فى حته؟؟
اصلى سمعت طراطيش كلام كده

متنساش تطمنى بقى

سلاموووز
................................



.:.-=- ELGaZaLy-=-.:.


غزازيلو

ازيك؟؟

انا عارفة موضوع الجلابية
اذا كان نزل بالبيجامة الكستتتتوووور ياراجل
!!!!!
بص هو الجيش انضف يدا

بس هل ده لانهم انضف فعلا ولا لان سلطاتهم اقل مش زى الشرطة؟؟؟ ;)

وبعدين خلى بالك ان راس السمكة جيش يامعلم
ههههههههههههههههه

صباح الفل
...............................



سكوت هنصوت

بت ياسكوووووت

ازيك يابنتى؟؟؟

وحشتينى ملةةةةةةةةةةةةةة
على رأى بتوع مولدى تريكس :)

والله يابنتى عليكى وعلى الغزالى

قال ساكن جنبه

انا من منبرى هنا بقولكو اتفقو واعملو معاه حوار ابقى انا امكو الروحية فيه
هيهيهيهيهيهي

منورانى يامذة

...............................



محمد ياسر


ياباشا انت تأمر

اجيبهولك لحد عندك يحكيلك قصة حياته بنفسه
انا عندى كام زيزو؟؟؟؟؟؟؟؟؟؟؟

يالهوى يالهوى!!!!

وحشتنى جدا ياولا

ابقى اسأل

readingtuesday.blogspot.com said...

احكيلنا حدوتة بقى عن عمر بن الخطاب كمان

سكوت هنصوت said...

ندعوكم لحضور حفل توقيع كتاب مدونات مصرية للجيب بمكتبة عمر بوك ستور يوم الخميس القادم الموافق 22 من مايو 2008 من الساعة السادسة وحتى منتصف الليل

البتاع said...

Ahmed Shafie


والله يااستاذ احمد كلامك يحمل معنيين

يحمل طلب ويحمل تريقة
بس بما ان حضرتك اول مرة تنورنى فاانا حاخد الجانب الحسن


بس انا اسفة يااستاذ احمد انا مبحكيش حواديت

ولو كان تصادف وحضرتك اعتبرت اخر بوست حدوتة فانا برضه مبحكيهاش بالطلب

وان كان وبعد كل شئ انا مطولش اكتب عن سيدنا عمر بن الخطاب

وبرضه منورنى مهما كانت نيتك

................................



سكوت حنصوت



علم وينفذ يافندن

readingtuesday.blogspot.com said...

لا أرجوكي لا تحملي كلامي أكثر مما يحتمل. أنا أقصد معنى واحد

البتاع said...

Ahmed Shafie

حاضر ومنورنى يافندم :)

ibn nasser - ابن ناصر said...

اه رجل جميل فعلا
ويوم مامشي عملولو صنف اسمو باي باي رشدي
وتحياتي