والله ماكنت عاوزة
لا بجد مكنتش عاوزة
انا مالى؟؟؟
احشر نفسى ليه فى اللى ماليش فيه؟؟
بس انتو عارفين يموت ال......وصباعة بيلعب
من الاخر مقدرتش
امبارح الموافق 27 مايو غير انه سنوية ابويا تعيشو وتفتكرو
الا انه يوم عادى صحيت عادى متأخر
وبفتح التليفزيون زى اى طالب عنده امتحانات عادى يعنى :-)
ابص الاقيلكو ايه؟؟؟؟؟؟
الاستفتاء على الزعيم المفدى بشار الاسد لفترة رئاسة ثانية
!!!!!!!!!
انا قلت الكلام ده مش غريب على ودانى سمعته فين؟؟ سمعته فين؟؟؟
قعدت اعصر فى نافوخى لحد ماافتكرت انى بسمعه كل يوم فى القناة الاولى :-)
المهم
للى مشافوش الاستفتاء
حعمل بث مباشر من قناة " سورية " لحبايبنا الحلوين اللى مااتفقعتش مرارتهم لسة
اولا
ستوديو شبيه جدا جدا بإستوديو صباح الخير ياشبرا النملة اللى بيجى عالقناة الاولى عندنا
ثانيا
مذيعة شبة مذيعاتنا برضه
ثالثا
صورة بشار بعرض الحيطة مع شعار كبير تحتها
"منحــــــــــــــــــــــــــــــــــــــــــــــــــــــــــبك "
الكلام بقى
على أصالة الزعيم المفدى
وحلاوة الزعيم المفدى
وجمال الزعيم المفدى
وبث مباشر من مقر الانتخاب فى دمشق
فين ياولاد؟؟؟؟؟؟
طبعا فى كلية طب
مش هو متخرج منها؟؟؟
ورجاء بقى للمواطنين اللى حيطرشقو سعادة بالتزام قواعد المرور
والامان
وبناءا على طلب الجماهير تم مد مواعيد الاقتراع حتى العاشرة مساءا
عشان كله يقرع
ومحدش يبات نفسه فى تقريعة
بس نرجو
وعدم اطلاق نار فى طهور....قصدى استفتاء الزعيم
"واللى يحبنا ميضربش نار فى فرحنا "
وهو السيدة عديلته ( دى غير عديلة بتاعت بخيت ) رايحين يستفتو
لا وايه؟؟؟؟
اللى يفقع بقى
ان مجلس الشعب بتاعهم بيؤيد اعادة ترشيح السيد بشار مرشحا ( اوحد ) للرئاسة
!!!!!!!!!!!!!!!!!
كــــــــــــــــــــــحك
لامؤاخذة
هو اللى شاف بلوة غيره هانت عليه بلوته اه
بس تخيلو معايا لو نزار قبانى كان عايش
كان حيقول ايه؟؟؟
كانت قصيدته فى المناسبة الميمونة جدا دى حتبقى ايه؟؟؟
...............................................................
وده بيؤكد ايه ياجماعة؟؟؟؟
ان فعلا احنا والاخوة السوريين تجمعنا اواصل الاخوة
وعبد الناصر كان عنده حق لما عمل الجمهورية العربية المتحدة مع سوريا
ده احنا طوبة واتقسمت نصين ياربى؟؟؟؟؟؟
بس بجد
من مزنقى هذا احب اقول
ميرسى كتير لقناة سورية على اليوم المفتوح امبارح
وياريت فعلا يزودو من جرعة الكوميديا فى برامجهم
أولادى وبناتى مشاهدى هذة المدونة
كنا مع بعض بنتفرج على اخر اصدارات الدراما السورية
مع وعد بتقديم كل ماهو جديد
وإلى اللـــــــــــــقاء
.jpg)
55 comments:
ياعزيزتي احنا عرب .. يعني القبليه بتجري في دمنا من ايام خزاعه وحمير والناس القديمه قوي دي .. شيخ القبيله حتي لو كان .... و.... و... فلازم بردو يفضل كبيرنا وعلي راسنا من فوق وان ماشليتوش الارض نشيله علي دماغنا ..ولازم وحتما نقطع من قوتنا وقت عيالنا ونديله ..اومال.. مش هو كبيرنا بردو ..ياشيخه انتي شريرة قوي وسودا قوي من جوا ..هما الزعماء العرب بيعملو ايه غير الكلام اللي بقولك عليه..هما اخدوها من قصرها وفرضوا علينا اننا نشيلهم علي دماغتنا وبياخدو كدا منهم لنفسهم من قوت عيالنا ..عاتشي بقي
..وبعدين بما اننا عرب فميرضيكيش يعني اننا نبقي من غير .ك..زعيم ..
ويروح..زعيم..ويجي ..زعيم.. واحنا بردو هانفضل عرب
تحياتي يا جميل
Deja Vu
ده ولا إيه ... أنا سمعت الكلام ده فين فين ؟؟ !!
إلا صحيح هوا الريس عنده ولاد تانيين غير المحروس جيمى ولا إيه ؟؟ مين أصاله و حلاوة دول
----
أصالة الزعيم المفدى
وحلاوة الزعيم المفدى
وجمال الزعيم المفدى
----
و إحنا بقى مقر الانتخابات عندنا إن شاء الله هايبقى فى الـ AUC طبعاً بجملة الدى جا فو
يلا و أهو يبقى بجملة المسخرة
و فعلاً يروح..زعيم..ويجي ..زعيم.. واحنا بردو هانفضل عرب
تحياتى يا فندم
إختارناه وبايعناه
روحه سمحه أدب ومصالحة
صافي القلب ياكفر ... مش فاكر
إختارناه إختارناه
فوله وإتقسمت نصين يابنتي
تحياتي
هاهاهاهاهاهاهاهاهاهاهاهاها
مش قادر أمسك نفسي
ولولا أنى فى المكتب كنت نزلت ودبدبت ع الأرض من كتر الضحك
تجنن
لكن بجد ألى فاتك هو ما سمعته أنا من بث حي مباشر عبر الأنترنت وأنا أتحدث مع أشخاص بسوريا الشقيقة، عرض حي للموالد والمهرجانات وحفلات الدبكه والهيصه ألى دايره ليل نهار كانت أحتفالا بترشيح الزعيم الطبيب
لكن طبعا هم لم يصولا لمستوانا التكنولوجي العلمي بتاع توصيل التصويت للمنازل ، فكل رب أسره لازم يلم هويات أسرته لامؤاخذه ويروح يصوت
وألى زوره سالك يصوت علينا والنبي
بعد موت حافظ الاسد تم تعديل الدستور لتنتقل الخلافة الى ولى العهد بشار
كربون مما يحدث الان فى مصر
ولكن
هل تعتقدى ان هناك بديل قوى يفرض وجوده امام جمال مبارك ؟
اريد شخصية بعينها
كلما مررت بمدونتك ازددت إعجاباً بقلمك الساخر
اضحكتيني للغاية يا عزيزتي
تحياتي
ههههههههه
كلو عند العرب صابون
ومن مصر لسوريا ياقلبي لا تحزن
انتي سنوية ابوكي كانت امبارح
انا بقى سنوية أبويا النهاردة
ربنا يرحمهم و يرحم موتى المسلمين اجمعين
تعيشي و تفتكري و مانجيلكيش في حاجة و حشة
تحياتي
None
عزيزتى نون لو الليلة كده انا مستعدة ادى عروبتى لبتاع الروبابيكا حضرتك
يولع الزعما كلهم فى ليلة واحدة يارب
يدوس عليهم اتوبيس سياحى فاخر يااااااارب
منورانى كتير
والف مبروك على موضوع الفرح
ولو انى مش عارفة انتى واللا حد من شركائك فى البلوج الصراحة انا تهت منكو خالص
بس من الاخر منورانى كتير وفعلا بروفايلك فيه منى
تحياتى ياقمر
........................
... الـبـتـاع
عزيزى البتاع قرينى
اهلا بيك فى مدونتى المتواضعة والله بتنورنى
وطبعا دى جافو
انت فى العالم العربى يعنى مليون دى جا فو فى اليوم
بس حلاوة واصالة دول مش اخوات جيمى
دول ولاد عمه فى سوريا
هههههههههههه
المهم طمنى على مجريات الفرع فى اسكندرية وبوسلى البحر
معرفش ازاى بس اتصرف
تحياتى
.........................
The Alien
هما كانو بيقولو كده بس بالسورى
بس مكانش فيه كفر مصيلحة
لان سوريا مفيهاش مصيلحة
ده الاختلاف الوحيد
وتحيا الوحدة العربيةةةةةةةة
تحياتى ياباشا
...........................
Alexandrian far away
اولا اهلا بيك ضيف جديد فى مدونتى
ثانيا
ماتضحك ايه يعنى؟؟
ودبدب كمان؟؟
اخرها ايه رفد؟؟؟
ولايهمك
!!!!!!!!!
المهم صحتك
:-)
دبكة وهيصة؟؟
الحمدلله انه فاتنى
انا صاحبة عيا ومش ناقصة
بس احنا تكنولوجيتنا لا تضاهى
احنا فتينا الميتين ياراجل
يعنى جد جدك انتخب مبارك الحمدلله
وده قمة الاعجاز العلمى
منورنى تانى وان كان قلبى بيقولى كده والله اعلم انك بتكلمنى على انى ولد
قال صحيح الكلام ده؟؟؟
.........................
Mirage
اهلا بيك ده اولا
منورنى ده ثانيا
ثالثا مش مهم ان يكون فيه حد يملا مكان مبارك غير جمال
المهم انه ميكونش جمال
حد بعينه ممكن اقولك
يحيى الجمل بحبه جدا
عمرو موسى محترم جدا
ايمن نور ياخد فرصته يبقى شئ لطيف جدا
المهم ميبقاش حد من العيلة دى ولا اعوانها
ونبقى احنا الشعب الى اختارناه
اختارناه بجد مش الاوبريت
نورتنى كتير
تحياتى
.........................
صاحب البوابــة
اخجلتنى كتير بإطرائك لقلمى المتواضع
وربنا يخليك ليا وتعدى هنا على طول
ويارب كل اللى جاى يعجبك اكتر
منورنى دايما طبعا
تحياتى
..........................
الحصان الأسود
اولا البقاء لله وربنا يجعلها اخر الاحزان
ثانيا منور المدونة على الاخر
ثالثا بجد الله يرحمك يانزار
اهو من ضمن موتانا اللى كان نفسى اسمع كلمته فى يوم زى ده
ياريت تنورنى دايما
تحياتى
الباشا البتاع
صباح الفل
احيكي من قلب العروبة النابض .. يعني اي بلد عربي يعني اي مدينة عربية و من الغربة بحيي مصر و سوريا و الوحدة العربية و سمعني 2 سلام جمهوري
عايز اقول ان اقرب مواطن عربي لقلب المصري هوة الشامي و العكس صحيح .. اصلنا ولاد عم
و انا و ابن عمي زي بعض بقي و بلاد توقيع بين ولاد العم
ولازم تعرفي اننا رواد علشان مصر بلد الريادة ولامؤاخزة .. مش مهم في ايه لان الريادة بتبان حتي لو البلد مغسولة ببرسيل و اريال مع بعض.
ولازم نقول كمان ان ريسنا الراجل الكبير قوي و الجدع قوي دة قدوة لينا و لغيرنا ..و
تحيا الوحدة العربية
و بس خلاص
السلام عليكم
والله انا كمان كنت لسه جاى من الشغل برده
وشوفت نفس اللى شوفتيه بس ماغرفتش أنقله للناس أزاى, بس تغطيتك للموضوع جامدة جدا
وضحكتينى برده فى وسط الغم اللى شايفه فى الحياة من لامبالاة وكله منفض لكل حاجة
مش بتزورينى ليه والله العظيم لسه شارى نسكافيه جولد منزوع الكافين جامد مووووت ومبيض للقهوة كمان قليل الدسم علشان قال أيه باخس وباكل خس وجزر وخيار أرنب صغير يعنى
ههههههههههههه
مستنيين زيارتك
عزيزتي البتاع
يعني انتي بالزمة مش عارفة نزار كان قال ايه
لو موجود دلوقتي
ماهو قالها من زمان
طبعا انتي عارفاها .. اسمحي لي اكتب جزء صغير منها
هذي البلاد شقة مفروشة
يملكها شخص يسمى عنترة
فمنذ أن ولدنا ونحن محبوسون في زجاجة الثقافة المدورة
و اللغة المدورة
و منذ دخلنا المدرسة
و نحن إلا سيرة ذاتية واحدة
تخبرنا عن عضلات عنترة
ومكرومات عنترة .. و معجزات عنترة
و لا نرى في كل دور السينما إلا شريطا عربيا مُضْجِراً
يلعب فيه عنترة
لا شيء في إذاعة الصباح ، تهتم به .
فالخبر الأول فيها ، خبر عن عنترة
و الخبر الأخير فيها ، خبر عن عنترة
لا شيء في البرنامج الثاني سوى :
عزف على القانون من مؤلفات عنترة
ولوحة زيتية من خربشات عنترة
و باقة من أردأ الشعر بصوت عنترة
هذي بلاد يمنح المثقفون صوتهم
لسيد المثقفين عنترة ..
يجملون قبحه ، يؤرخون عصره ، وينشرون فكره
و يقرعون الطبل في حروبه المظفرة
اعجبني جدا اسلوبك الساخر الجميل
لكي اخلص تحياتي
طويل العمر يطول عمرة..يزهزه عصرة..وينصرة على مين يعادية..هايهئ...
تخيلي يا بتاع يا حبيبتشي...النتيجة في الإستفتاء الي فات كانت 97.3% يعني كان فيه حوالي 2.7% من الشعب خونة...بس الحمد لله ربنا وفق الزعيم المفدي وقضى على القلة المندسة دي تماما..امال يا حبيبتشي..ربنا ينصرة..ده راجل امير..راخر الشعب خاف الشرذمة الضئيلة دول من الخونة يأثروا على الرأي العام العربي و يفتكر ان هما اكبر من حجمهم..عشان كده الشباب السوري كتب خطاب مبايعة للرئيس السوري بدمهم...ايه..في قسم الشرطة..!!! مين جاب سيرة قسم الشرطة..ده كان في السفارة السورية بمصر...اه والله العظيم..انتي فاكرة ايه..ده احنا جدعان قوي...امال هما خدوا المركز الثاني في الإستبيان بتاع اتحاد الصحفيين العرب من شوية.....ميرسييع ليكي انك كتبتي عن الخبر..اصلي كنت محتارة انشرة ولا اتكلم عن مجلس الشورى..تحياتي يا قمر
أنا طول عمري أقول إن الدراما السورية ستتفوق على الدراما المصرية!
خلاص ياحاجة باتعة.. سيادة الطبيب القائد المفدى لن يغادرها إلا إلى القبر برغم حقد الحاقدين وحسد الحاسدين من أمثالك!
أنا عارف الحقد بتاعك ده على السوريين.. عشان رئيسهم طبيب وبيديهم حقن ببلاش!
بصي يا ستو انا
مصر زي سوريا زي السودان زي اليمن زي تونس
كلنا في الهم سواء
تحسي كدة انه جين تخلف ضارب في الحتة دي من العالم
بصي....انا قلت الحل دة من زمان وافتكروني بهزر
هي قنبلة نووية تدمر الجزء دة من العالم باللي فيه ومنهم احنا كمان...ويطلع بقى شعب جديد على نضاااااااافة
والله ماهتتحل غير كدة
راجعي تاريخ اليابان قبل وبعد القنبلة الذرية
تحياتي ليكي يا ستووو انا
وده تكليف مش تشريف ولا فخفخة ولا ملك وجاه
حمل تقيل وهموم جيل جي واجيال تانية واراه
وعشان كده احنا اخترناه
شعر من تأليف حباصة افندي ماسك طبلة
انا مش عارف انتو زعلانين ليه...ده حمل ياجماعة وحمل تقيل..الناس دي مابتنامش يساتر ع الحقد
تحياتي ياصاحبة البتاع
صباح الخير
لأ الحقيقه أنا أحدث حضرتك بصفتك أنسان أولا ثم بصفتك أمرأه
ثم الموضوع ما كانش حيكون رفد ولاشىء لكن كنت حأقضى وقت طويل ممل اشرح لشلة أنجليز وأستراليين وهنود وسويديين - زملائي بالمكتب- أنا باضحك قوى ليه كده
والنور لى يافندم
صباح الفل
اخر من الاخرين
منورنى يااخر
وازى باقية الاخرين اخواتك؟؟
حلوين كده؟
ثانيا حيينى من قلب العروبة الموجوع او الساكت
لكن نابض دى واسعة حبتين
طبعا احنا وهما ولاد عم
وانا وابن عمى عالغريب
وهيييييييييييييييه
وسمعنى احلى تحية لفهد دبلان:-)
والعواف بقى
.........................
عبقرينو
اولا اهلا ياباشا وعود احمد
والحمدلله انى قدرت اعبر عن حاجة كانت مضايقاك انت كمان
ثانيا سيبك انت من القضية والكلام الفاضى ده
قولى
جبت الجولد المنزوع ده منين؟؟
انا عندى منزوع الكافيين بس بونجورنو
ولايمنى عالمبيض قليل الدسم
انا مش عاوزة اخس
بس ليه تاكل اكتر لما ممكن تاكل اقل؟؟
ده مبدأى فى الحياة :-)
اجهز انت بيهم وانا حتلاقينى ناطالك كل شوية فى المدونة
تحياتى ياكبير
........................
Big Code
كده بقى انا زعلت تصدق؟؟
لالالا متحاولش
زعلت خلاص
انت مش عارف انى قعدت حطة القصيدة دى بصوته عالمدونة بتاع اسبوعين لما الناس كرهونى؟؟
واضح انك مكنتش متابع ياكوووود ;-)
عموما انا كنت عاوزة اعرف حيخليه عنترة واللا حيسميه مبشرة؟؟
بس
ميرسى كتير لذوقك
وتحياتى ياباشا
..........................
sokoothansawat
حنصوت هانم
ازيك؟؟؟
وحشتينى وحشتينى
امووواه...امووواه
" ملحوظة : دول بوس"
ههههههههه
بحس احيانا ياسكوت انك بتجرينى اقبح
اه والله بحس انك متعمدة
لما تقوليلى كلام يفقع زى الشعارات بالدم دى المنتظر انى لازم اقبح
.....ياولاد
يالا بخاطرهم ياختشى
بخــــــــــــــــاطرهم
انا عندى امتحان وعايزة اعصابى
اااااه
والحمدلله انك كتبتى عن مجلس الشورى وادينى اهه
بقلب الام حسيت انك عاوزة تكتبى عنه فكتبت
هو انا ليا غيرك ياحنصوت يااختشى؟؟؟
نورينى كده على طول
وهاتى حنصرخ معاكى هه؟؟
تحياتى
..........................
Davinci
دفششوشتى
ازيك؟؟
انا بحقد عليهم عشان بياخد حقن ببلاش؟؟
ليه؟
هما بياخدو حقن بس؟؟
لا ده بيطبق عليهم دراسته كلها
وانت عارف الطب فى سوريا بالعربى
يعنى كل الكلام مفهوم
نفخ يعنى نفخ
تعليق يعنى تعليق
مالهاش معنايين
عموما
تحيـــــــــــــــــا الامة العربية
بس مش بضم الالف فى الامة
بفتحها بعيد عنك
...........................
A.SAMIR
والنبى يااحمد عندك حق
انا برضه بقول كده
حنوجع قلبنا وندن فى مالطة؟؟؟
احنا لو مشينا على كده عموما
حنتهور على ايران مع امريكا
وايران تضرب نووى
يجى فينا ونخلص الليلة بقى
بس ابقى فكرنى انا وانت نهج على برة قبلها :-)
..........................
غمض عينيك
منورنى ياغمض عينيك باشا
الاغنية دى حبيبتشى لعلمك
مكتش اعرف انام غير لما اسمعها
بحبه ياجدعان بحبه
وفى الاونة الاخيرة حسيت انه معلم
بضم الميم
كل الزعما بقو نسخ صغنونة منه
ياخلاثى ياخواتى
رائد
وانا بحب الريادة عشان كده بحبه
دايما لما بتيجى سيرته بفتكر مظاهرة الستات فى مسرحية
" حب فى التخشيبة"
بالروح ...بالدم
نفديك ياميييييييدحااااااات
هههههههههههه
ايه اللى انا بقوله ده؟؟؟
تحياتى ياعم قبل مااخرف
.........................
Alexandrian far away
صباح النور ياقمر
طب مش تقولى ان الليلة فيها استراليين وانجليز ومذذ؟؟؟
طب ماتعبى وتجيب
!!!!!!!!
اختك عايزة يعنى ياسكندرى يااخويا
فين الاخوة والمروءة؟؟؟
حتبخل عليا ؟؟
اهئ اهئ اهئ
تحياتى
لا مفيش تحياتى لحد ماتجيبلى واحد منهم
بس نقى الاحلى وحياة والدك
:-)
البتاع ...
الله يعافيكي ياختي.. الاخرين بيسلموا عليكي و يتمنوا لكي رحلة سعيدة ..
لا هوة قلب العروبة نابض بي عندة اضطراب في النبض زي ما الدكتور المصري شخص و قال ..
انا و اخويا علي عبض علي ابن عمي علي الي ميمشيش عدل . يحتار عدوك فيك
و 2 سلام جمهوري للناس الحلوين و معاهم 1 استفتاء و صاية ياجدع
اعدي بالعافية
المثل القديم بيقول ايه
ده طين وده طين والاتنين من نفس المعين
ده توكيد على ان ذاك الشبل من كل الاسدة اللي في المنطقة وان اللي يموت ابوه زعماء المنطقة كلهم اهله .. وان الزعيم الشاب الأمور الطبيب الحليوة الطويييل خالص يستلهم حكمته وقيادته من بابا اللي لسه عايش وطابق على انفاسنا ..
وده تذكير للطريق اللي سوريا ماشية فيه على طريق الريادة
وابقوا فكرونا لما نيجي نهج من البلد ما نروح ع دمشق
بالروح بالدم نفديك يا بشار
:)
حقول ايه يعني تاني...ربنا يستر و ما يجي اليوم اللي الامريكان ينطوا فيه في سوريا و نلاقي صور بشار زي صور صدام
تحياتي لكي
اخر من الاخرين
عم اخر
اكتب عربى الله لايسيئك
انا علامى على قدى
هو انت قايل كلام جامد الصراحة
بس انا مش فاهماه
يمكن عشان لسة جاية طازة من الامتحان؟؟
تحياتى يابرنس
واقعد انت بالعافية
...........................
bluestone
نورتينى ياقمر جدا جدا جدا
عرفت انك بنت من اول ماقلتى اسدة :-)
اسمهم اسود ياماما ماتضحكيهمش علينا :-)
بس عندك حق
هى دى الوحدة العربية
اللى خلف مامتش برضه
والا ايه؟؟
نورينى كتير هه؟
تحياتى
..........................
micheal
ميكوووووو
كيفك ياراجل؟؟
والله عندك حق
الشعب حيبصق على ابو امه
مشيها يبصق معلش :-)
يالا
هم يضحك وهم يفطس من الضحك
ايوة كده ياميكو نورنى كده
احسن بتوحشنى ياراجل
بيس يامان
هيه طوبة دي... طوبة و انفلقت نصين فعلاً
ربنا يفرحهم كمان و كمان، و يحبوه زي ماهم عاوزين... احنا فديك الساعة يعني
ميرسى ع البث المباشر
بس ايه "الزعيم الطبيب" دى,دكطور يعنى؟
اه ياجماعه اللى قرا التدوينه ومفهمش يعنى ايه "كـــــــــحك" دى احب اقولكو انها كلمه اعتراضيه زى احه كده,بس صاحبتى مؤدبه ومبتقولش الابيح الكلام ده
معلش يعنى انا بشرح للناس الصيع الوحشين اللى موش هيفموا لغتك الراقيه,يا ام مدونه نظيفه
محجوب عبد الدايم
اولا منورنى ياباشا ومدونتك عسولة جدا
بس هو اسم محجوب مش اسم لامؤاخذة ال........اللى كان فى فيلم القاهرة 30 واللا انا حصلى لبس؟؟؟
لا احنا مش فديك الساعة
ياخويا يولعو ببعض
ان شاء الله لما يموت حيولعو فى الشعب معاه
عشان يعيشو سوا ويموتو سوا
:-)
منورنى يابوص
...........................
SaSo
يابنت ال.......بتزنقينى فى الحيطة؟؟؟
لا يااختى انا مدونتى مش نظيفة
ولا وسخة
مدونتى حرة
قول اللى فى قلبك
بس من غير تجريح
ده مبدأى فى التدوين
انا لو جدعة امسح الكومننت ده
بس حرية التعبير بتمنعنى مش الصداقة هه؟
متعشميش اوى
بتزنقينى ياساسو؟؟؟
حسابك معايا بعدين
ورحمة ابويا لاجى اخد كتبى اللى عندك واوقف دعم الكتب
عاوزة كتبىىىىىىىىىىى
والله انا كنت جاى اعلق
لقيتنى فطسان من الضحك على التسييح اللى بينك و بين ساسو
و نسيت كنت هكتب ايه
ساسو....رجعلها الكتب و ريحى دماغك
:)
يالهوى يااحمد؟؟؟؟؟؟
انا بتباع وش كده
!!!!!!!!!
ربنا يسامحك
ريحى دماغك؟؟؟؟؟
ده بدل ماتقول بقين حلوين فى حقى؟؟؟؟
ده انت فى بيتى ياراجل عيب علييييييك
بتاع ....
معلش يا باشا اصل لساني خد علي الهندي و الفلبيني و هذا نفر ما في سيدا صديق و حاجات كدة :) اكل العيش مر يا اختي ...
نصيحة مني متخديش كتبك اللي عند ساسو و خليهم كدة علشان في كل موقف تقوليلها هاجي اخد الكتب .. كسر عين برضة :)
تحية مني للحرية و برضة كان ممكن تكوني ابرد من كدة و تقوليلها انا اصلي لغتي راقية .. و مدونتي نظيفة و القطنة مبتكدبش .. اصل التفاعل مع الاستفزاز دة يبسطها هية انما لو كنتي باردة ... جربي و شوفي النتيجة
انا جاي اهدي النفوس بس و ربنا يكفينا شر تسييح الاخوة المدونين :)
موضوع جميل احيكي علية
مات الزعيم عاش الزعيم
عرب ... بجد عرب وبس
اخر من الاخرين
لا ماهو باين تهدية النفوس
!!!!!!!!!!!!
عموما انا بكرة حاخد الرجالة بتوعى ونروح نضرب الرجالة بتوعها
سامعنى ياللى فى بالى؟؟؟
منورنى يااخرور( دلع اخر) ومتنساش تسلملى على أخرى
وقولها تبقى تسأل عيب كده يعنى :-)
..........................
عمرو غريب
ميرسى ياعمورة
مع انى قلبى بيقول حاجة وحشة كده
تصور ياجدع بيقولى قال ايه؟؟؟
انك بتقرا تقضية واجب؟؟؟
مش عارفة حسة انك بتوجب معايا من منطلق الواجب المتوجب
فهمت حاجة؟؟
اهه هو ده :-)
تحياتى يامجتهد
..........................
.:.-=- ELGaZaLy-=-.:.
منورنى دايما ياغزالى
وفعلا
عاش الملك
يخليييييه ويطول فى عمره
مات الملك
يجحمه مطرح ماراح
ده ابن 60 مضروب فيهم 70
حسبة صعبة صعبة يعنى :-)
تحياتى ياكبير
أول مره أدخل عندك
بس هو ده حال كل البلاد العربيه مش سوريا ولا إحنا بس
أصل إحنا عندنا وفاء لزعامئنا إنما الأجانب ناس بارده معفنه ...وبتوع مصلحتهم
فبيقلبوا الزعيم مادام مش جاي من وراه مصلحه
لكن إحنا لازم نقف ورا زعيمنا حتي لو مغرقنا كلنا
شفتي وفاء أكتر من كده
وبالروح بالدم نفديك يا أي واحد مضيع كرامتنا
سلامااااااااااات
بتاع
خلاص لو احتاجتي اي خدمة .. سلاح .. عربيات اسعاف .. عايزين الشركة تطب عليكوا .. قوليلي بس
سامع ياللي في بالها
اخري سابتني يابتوعة(دلع بتاع)انسيها بقي علشان انا كمان انساها
هبقي اسأل انا بدلها
هههه.. أيوة هوه إسم الـ... اللي كان في الفيلم
ياختي يولعوا في بعض... أنا مش ناقص حرقة دم.. قال منحبك قال... على ايه يعني؟ على طوله؟
ربنا يهنيهم على بعض، دنيا و آخرة
أنا قلت أرد الزيارة. ولأنها أول زيارة لي ولأني قمت بجولة في شتى أرجاء المدونة ولأني قرفان من الكلام في السياسية على الصبح، لن أعلق على تدوينة الزعيم، بل على المدونة كلها.
اندهشت لما لقيت روح مدونتك فيها كتير من روح مدونة عايشه وخلاص. ولكن العجب زال بعد ما عرفت أنكو انتيمات. مدونتك هي تاني مدونة أضعها في مفضلتي. بنات تشرف مصر بجد. تحياتي
سؤال بريء: هو الواحد ممكن يلاقي بنات زيكو فين في مصر؟ ولا أقولك مش مهم!! هو كده كده اكتشاف متأخر جدا زي السؤال بالظبط...
.COMأولا : أسجل إعجابى بالمقال الساخر واطلب من الزميلة بتاعة السير على هذا النهج التي أبرزت تميزها فيه
ثانياً : يجب علينا توضيح بعض مجريات دوافع فوز الرئيس السوري بولاية جديدة اثر الاستفتاء
بعيداً عن التهليل , اعتمد بشار الأسد سياسة حافة الهاوية التي سبق وأن مارسها والدة متحديا النظام الامريكى وتناول خطابات الرئيس بشار شديدة اللهجة ضد الولايات المتحدة بسبب التهديدات التي تطلق من البيت الأبيض باجتياح سوريا في الشهور الماضية مما أدى كل هذا إلى التفاف الشعب السوري حول الرئيس وهذا طبيعي لكل الشعوب عند الشعور بمخاوف من نشوب حرب تلتف الشعوب حول رئيس الدولة مما أدى كل هذا إلى عزل سوريا عن الساحة الدولية . فنجح بشار في استخدام ورقة جديدة وهو تحالفه مع روسيا وإيران وحزب الله والتنظيمات الفلسطينية فضلا عن الحركات العراقية المعادية لأمريكا
وتحاذ تحالفه مع روسيا أعطى مكاسب اقتصادية, وسياحية , وفكرة إقامة معارض للمنتجات السوريا في كافة المناطق العربية مما أدى كل هذا لتخفيف البطالة إلى حد ما
مع إيران : القوة العسكريا وتبادل الخبرات العسكريا
حزب الله : لفرض المخاوف في القلوب الصهيونية
تنظيمات فلسطينية : الالتزام بالقضايا الفلسطينية
اى نعم بشار الأسد جاء موروث وبالفعل ابتعد عن ميوله الليبرالية التى كان يناشد به فى الصحف قبل وفاة والدة وتخذ نهج دولة الصين في الإصلاح الاقتصادي قبل الإصلاحات السياسية
في النهاية دا رأى المتواضع من دوافع نجاح الاستفتاء بشكل ملخص بعيد عن التهليل بالوريث السوري مع احترامي لباقي أراء الزملاء
يجب علينا تفهم الأوضاع ثم طرح ما نسعى من اجله
الزعيم المفغدى برضه ياااا ( البتاع) !!!! ، ماااشي يا ستي !!! ، بس بشـار مش أب !!! على كــل حال
تحياااااااااتي
فينك ؟؟؟؟
ibnzaydoooon@hotmail.com
تاني
سياسه تاني
مش قوبنا اننا تمام
و كله ميه ميه
و فل الفل
مش شايفه كل حاجه سهله
علي ما اعتقد
ان الزعماء العرب كلهم وجه لعمله واحده
مش من حقك تفكر او تقول رأيك عند اي حد فيهم
ابتسمي
انتي عربيه
مش عربيه بكلاكسات
هههههههههههههههههههه
تحياتي
reri
نورتينى ياقمر
ويارب مش تبقى اخر مرة ان شاء الله
بس عندك حق
العرب عندهم وفاء الكلاب الصراحة
الهى يارب يسخطهم قرود كده:-)
المهم نورك انت سيبك من اى حاجة تانية :-)
مستنظرة زياراتك هه؟؟
تحياتى
.......................
اخر من الاخرين
الحمدلله
ضربنا كرسى فى الكلوب وضبطنا الليلة
من غير ولا نقطة دم من عندنا :-)
انما يااخويا أخرى سابتك ليه؟؟
ماانت برضك لازم تبحبح ايدك شوية
دى كانت عمالة تشتكيلى من مصروف البيت
شبرقها كده
انت ليك غيرها؟؟
انا بهيس اوعى تاخد على كلامى:-)
نورتنى يامعلم
........................
محجوب عبد الدايم
بيحبوه ياجوبى يااخويا عشان متعلم ومتنور
ااااه
حاكم العلام حاجة مهمة برضك
الراجل من بس بكلمته
الراجل برعايته لبيته واسرته
واوعى ياشابة تنسى الحبة
......
ايه اللى انا بقوله ده؟؟؟
نأسف على هذا العطل الفنى
تحياتى :-)
.........................
ابن فطومة
ياباشا تنور
ونفرش لك المدونة حروف
احنا فى ديك الساعة؟؟؟
هههههههههههه
وميرسى على انك ضفتنى فى مفضلتك
وانا و ساسو فعلا صحاب
بس يرضيك التسييحة دى؟؟؟
اوعى تتجيز لها
انا بحذرك :-)
ويابنى بنات تشرف مصر ايه بس؟؟؟
حتنفعنا يعنى لما نعنس؟؟؟
تتجوزنا احنا الاتنين ونعملك تخفيض؟؟؟
هههههههههههه
على الاقل احنا احسن ضراير ممكن يتفاهمو ع بعض :-)
لو عاوز مننا تانى عليك وعلى شارع عبد العزيز
بس حاسب ليكونو مضروبين :-)
نورتنى كتير
تحياتى
.........................
7ntklm
اهلا بيك يافندم
انما ايه التعليق الطويييييييل اوى ده؟؟
انا قلت كلام يتعلق عليه بده كله؟؟؟؟
بس تعالى هنا
يعنى انت موافق عليه؟؟
انا مش بتكلم على سياسته اصلا
ولا بتكلم عليه اصلا يمكن
مع انى عندى بعض تساؤلات
.....انا بتكلم عن الشعب
اللى كان بيهلل اوى
كأنه بيهلل لنبى استغفر الله العظيم
امتى حنتخلص من عبادة الحاكم؟؟
حتى لو كان قمة العبقرية
!!!!!!
حاجة مقززة اوى ان تلاقى ده عندنا احنا بس احنا والدول التعبانة عامة
بيستمدو قوتهم منه او بيتفادوا قوته بنفاقه
موافقين انه ياخد صلاحيات الاله وساكتين
!!!!!!!!!
ده كان تحفظى الاهم
بالنسبة لتساؤلاتى
تعاونه مع روسيا عمره ماحيحميه من اى مخطط امريكى اسرائيلى ضده
ولو هو متخيل ده يبقى طبعا غلطان
وايه علاقة تعاونه العسكرى مع ايران وانه فتح اسواق فى العالم العربى تجارية؟؟
انا شايفة ان كل اللى انت بتقوله اشياء ضده
تعاونه مع كل دول بيحطه فى البلاك ليست اكتر
فى حين انه مش حيقدر يعمل حاجة
ليه يوهمهم انه قادر؟؟؟
ده برضه رأى بسيط وتعليق ابسط على كلامك
وانا مبسوطة اوى بتعليقك
بجد :-)
ومنورنى كالعادة ياحنتكلم باشا
إبـراهيم ... معـايــا
ابراهيم باشا؟؟؟
ايه النور ده؟؟؟
ليك وحشة فوق الفظيعة بجد
اعذرنى عشان امتحاناتى
.......مسحولة سحلة
يرزق بيها عدوينك
ادعيلى اخلص بقى
ثومان ماله الحاج بشبوش؟؟؟
ده راجل كمل
ايوا والنبى كمل
حتى طويييييييل العمر
يطول عمره ويزهزه عصره
وينصره على شعبه
آآمين
:-)
بالنسبة لموضوع الايميل ده
ميرسى كتير
وتم الحفظ :-)
تحياتى يابرنس
وايوة كده متغيبش عليا
•«ρяoιd»•™
لا ياعم لو الموضوع كده حقدم طلب اتحول لفيزبة
!!!!!!!!
انا اقول رأيى واقبح كمان
واحط صابعى فى عين اجعص جعيص فيكى يابلد
!!!!!!!
يجى حتة مبارك وحتة جمال يحبسو صوتى؟؟؟؟
فشرررررررر
ماعاشو ولاكانو ابدا
ههههههههههه
منورنى كتير يارامى
حمووووت واعرف اقرا اسم مدونتك
!!!!!
يالا ماعلينا
تحياتى ياكوتش
البتاع في حاجة انا عاوزك تعرفيها ان انا من النوع الي عمري مبجامل حد ويمكن هذة الصفة مخسراني كثير من زملائي لان انا من وجة نظري ان البيجامل دة بيعتبر منافق كل الموضوع يا بتاع ان انا لما بعجب بحاجة مبحبش اعبر بكلام كثير لا خير الكلام ما قل ودل ماشي يا تباع لا قصدي يا بياع ههههههههههه اوعي تزعلي من بتاع وتباع انا قصدي اهزر سلام واتمني لكي التوفيق
بتاع ....
هية الخسرانة .. انا مضربتهاش علي ايدها و قولتلها امشي . و انا اللي يسبني و يمشي ميجيش تاني احسن :)
و اي خناقة في اي بلد ميسد علي طول ابعتلك الرجالة من علي القهوة ..
اي خدمة يا باشا
علي فكرة بشار ليه شعبية مش قليلة فعلا في سوريا وده من واقع اصدقاء سوريين كتير ليا
عمرو غريب
عمروة
لا انا مش زعلانة
انا بعاكسك بس :-)
وزيارتك بس بتنورنى
وبس ابوس رجلك رتب بوستاتك
انا بلاقى القديم بعد الجديد
وبتوه خالص
بس ولا يهمك
انا عندى كام عمرو؟؟؟
منورنى على طول
تحياتى
........................
اخر من الاخرين
صح
اللى يبيعك بيعه
وعموما ربنا يرزقك بست ستها
ثم مش لازم اديلك ميسد كول
انا واثقة انى مجرد افكر فى انى محتاج مساعدتك حلاقيك على طول :-)
منورنى يااخرور
"دلع اخر"
تحياتى
..........................
قاسم أفندي
: اولا
منور مدونتى المتواضعة يافندم
: ثانيا
هل ده صح؟؟؟
امتى حنحكم عقلنا فى علاقتنا بالحاكم؟
امتى حنحس انه موظف مش اله؟؟؟
ثم انى اقول اننا جمهورية ويجى ابنى يمسك الحكم من بعدى يبقى انا مش محترم الشعب ده اصلا
وبقرطسه بقرطاس كبيييييييير
ثم بشار قدم ايه لسوريا غير معتقلات و تهديد بحرب؟؟؟
يخلتف ايه عن ابوه
واللا عن مباركنا؟؟
منورنى بجد والله
وياريت تكررها :-)
تحياتى
انت بتتاخر كل شوية علشان تكتب بوست جديد لية
.:.-=- ELGaZaLy-=-.:.
قلبى
قلبىىىىىىىىى
اخص علييييييييييييييييك
انا مخاصماك
كل ده ومتعرفش انى بنت؟؟
لالالالا
انا بحتضر من هول الصدمة
بتوعة(دلع بتاع)
انا اللي يبعني اكيد مش هشترية .. و اكيد ربنا هيرزقني باللي يشتريني .
انتي فكري بس و شوفي
و تقريبا انا ببات هنا :) فأكيد منورك.اهم حاجة مكونش ضيف ثقيل
تحياتي
اخر من الاخرين
يالهوى؟؟؟؟؟؟
ضيف تقيل؟؟؟
اوعى تقول كده ابدا
ده انت صاحب مدونة
بيتك وطرحك يااخويا
انتي فين...ماحدش بيشوفك يعني ولا بنشوف بوستات جديدة
انا دخلت اطمن وابعت السلام
سلام
محمد سمير
ههههههه ماتتريقيش على سوريا وانتى عايشة فى مصر:) ...ماحدش عارف بكرة فى ايه
واصلا هناك عندهم الانتخابات والترشيح و كده زى فرح ابن العمدة كده ..يعنى عندنا برده بنعرف نسبوكها شوية لكن عندهم سلطة خاالص
يا بنتى ده لما الاسد مات قبل ما اسم الله عليه بشار يمسك الحكم..كان سن بشار ماينفعش انو يكون رئيس جمهورية...سبحان الله ...بعد ما الراجل مات مافتش عليه كام ساعة ..عدلوا الدستور بتاعهم وخفضوا السن عشان بشار يمسك الحكم..وطبعا المعروف ان الدستور ده بيكون ليه اجراءات طويلة ومش سهلة عشان يتعدل ...لكن كله يهون عشان عيون بشار:)
تحياتى ليكى
بتاع ..
دة كان عشمي برضة . بنات الاصول برضة بيبانوا..
عموما اي حاجة اندهي بس
هروح انام شوية بقي
غمض عينيك
حاضر ياباشا
علم وينفذ
.......................
NeRmeeN
نورتينى
انتى عارفة؟؟
هما ديتهم كورس عندنا فى السلق السياسى والتخريع الفكرى
حيتظبتو بدل المنظر العرة اللى هما فيه ده
نورينى دايما يانونة هه؟؟
تحياتى
........................
اخر من الاخرين
بس اوعى تعوء
احسن عاوزين حاجات من السوبر ماركو اللى على اول الحارة
نوم العوافى يااخويااااااااا
Post a Comment