تاج من الصديق العزيز النظارة السودة
ميرسى كتير رغم انى مكنتش احب ان اول تعارفنا يبقى مزانق كده :-)
-----------------------------------
أحب شخص لقلبك فى الدنيا؟
ميرسى كتير رغم انى مكنتش احب ان اول تعارفنا يبقى مزانق كده :-)
-----------------------------------
أحب شخص لقلبك فى الدنيا؟
حتى الان........أنــــــــــــــا
---------------------------
انسان مستعد تضحي بحياتك – ركز فى كلمة حياتك - عشانه؟
الانسان اللى حديله قلبى طبعا متغلاش عليه حياتى خالص
--------------------------
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
كل حد غبى او ديكتاتور او مدعى...او حاول يقيد حريتى
-----------------------------
ما هو:اسم أجمل كتاب كتبه بشر قرأته ومحتفظ به حتى الان؟
الاعمال الكاملة لنزار ( التسع مجلدات الضخام دول)بموت فيها
------------------------------
اسم كتاب -كتبه بشر برضة- انت متعلق بيه وبتقرأه كل فترة؟
نفس المجلدات دى بقراها واعيط او ادوخ حسب المود بس لازم مع شيكولاتة
--------------------------------
اهم جهاز منزلى انت متعلق بيه او بتستخدمه كتير؟
الكمبيوتر
-----------------------------
مكان تحس بالراحة عندما تدخله؟
سيلانترو كافيه اى فرع وخصوصا فرع نايل سيتى
--------------------------------
شىء تحس بالراحة النفسية عندما تنظر اليه؟
صور ميكى وبطوط وعم دهب حبيبى
------------------------------
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
ساقية الصاوى
---------------------------
اجمل مدينة زرتها داخل مصر ؟
اسكندرية
-----------------------
أجمل مكان طبيعي رأيته داخل مصر ؟
إمتزاج النيل فى البحر الابيض فى رأس البر
------------------------
شخصية كارتونية بتحبها؟
عم دهب
-------------------------
نوع هاتفك المحمول؟
نوكيا 6260
----------------------------
سرعة بروسيسور جهازك؟
3.06 GHZ
------------------------
حجم ذاكرة –هارد- جهازك؟
80
---------------------------
المساحة التى تشغلها المواد الاسلامية على جهازك؟
480 MB
-----------------------------
نفس المساحة السالف ذكرها فى قلبك -الاجابة لنفسك عشان الرياء يا اخواننا -؟
طالما لنفسى مش حجاوب
ثم انا مساحة قلبى مش بتتقاس بالميجا بايت ;-)
-----------------------------
أهم هدف انت واضعه لحياتك الآن؟
اتخرج كمان شهر واشتغل شغل ابقى مهمة فيه وأدى بجد
وأقبل فى السلك الديبلوماسى..
وحلمى القديم انى ابقى محافظ البنك المركزى .. والاقى حب حياتى..
واتجوزه واخليه اسعد حد فى الكون
------------------------------
مواصفات فتى الأحلام بالنسبة لك؟
هههههههه
السؤال ده كنت لسة بتسأله النهاردة من واحدة جايبالى عريس
بص
يكون مثقف
متفتح
مش حمار بتاع انا شرقى وانتى بنت وانا ولد
بس يكون شرقى بيغير عليا
يعنى.......يحمينى حتى اخر قطرة فى دمه
وفى نفس الوقت حنين حتى النخاع
ويتقبلنى زى ماانا ((ويعشق تفاصيلى)) و
يتحمل مسئوليتى من غير مايقولى انه متحملها
يحسسنى انى طفلة من غير مايهين ذكائى ولا
استقلاليتى
يكون عنده لسان نزار واحاسيسه
ورجوله رشدى اباظة فى فيلم " صغيرة على الحب" يحسسنى
دايما انى صغيرته وسيدته وملكة قلبه
ويكون امور طبعا
انا مقلتهاش فى الاول دى؟
----------------------------
صف ما يأتى:شعورك لما بتسمع كلمة مصر ؟
ساقطة ترفض التقويم
----------------------
شعورك لما بتسمع كلام عن اليهود؟
خنازير لكن اذكيا ومنظمين ومتحدين
وبيحبو بلدهم اوىى
-----------------------
شعورك لما بتشوف ظابط شرطة؟
عاوزة اخنقه حتى لومعمليش حاجة
عندى قناعة انه اكيد آذى غيرى
-------------------------
شعورك لما بتشوف الكناس العجوز فى الطريق؟
ان ياريته كان اتولد ايرلندى والا امريكى
لان ده مش آآآآدمىىى خالص
وبدمع
--------------------------
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
بحس الاسلام مش كده الاسلام أسهل وأعقد من كده
أعقد لانه مش مظهر خالص مكنش حد غلب
الدين المعاملة
وأسهل لان دينا سهل اوى وجمييييييل اوى
بس للاسف عاوز مخ
وهو كده؟؟؟
لاغى مخه خالص
-----------------------------
احساس يراودك فى اشارة مرور مغلقة بسبب مسئول كبير؟
ببقى عاوزة اروح اجيبه من صلعته احط راسه فى تواليت عمومى مش متنضف
وطالما عمومى اكيد حيبقى مش متنضف :-)
حتى لو اكبر صلعة فى البلد قصدى اكبر راس :-)
----------------------------------
امرر التاج لمين لمين؟؟؟
دول اللى جم على بالى دلوقتى
بس اظن انى كل مايجى على بالى حد قبل مااعمل بوست جديد حمررهوله
لا انا سادية جدا فى المواضيع دى :-)
.jpg)
28 comments:
اجابتك جميله
ومقنعه ولذيذة
بس ضايقنى حاجة بصراحه مش هعرف اسكت عليها :D
مين قال ان الاخوة الملتحين واللى بيتبعوا سنه الرسول بيكونوا لاغين عقلهم!!!
علشان بيتبعوا سنه الرسول
هو احنا مش مأمورين بكدا ولا ايه
انا معاكى ان الدين مش بالمظهر
بس مينفعش احنا نحكم عليهم ببساطه كدا ان عقلهم ملغى
احنا كدا بنعمل زى الغرب فحكمهم على المسلمين انهم ارهابين علشان قله منهم منحرفه بقينا كلنا كدا
كمان احنا بنحكم على الناس دى انها عقلها ملغى علشان قله منهم كدا
مش ربنا قال فى القرأن
قُلْ إِن كُنتُمْ تُحِبُّونَ اللّهَ فَاتَّبِعُونِي يُحْبِبْكُمُ اللّهُ وَيَغْفِرْ لَكُمْ ذُنُوبَكُمْ وَاللّهُ غَفُورٌ رَّحِيمٌ
اعتقد ان اللى يتبع سنه رسول الله دا مش مخه ملغى بالعكس دا بيفكر صح بيفكر للحياه التانيه اللى كتير منا متجاهلها
بس خلاص :D
بعد ما تديله قلبك
زكمان بعد الجواز بثلاث اربع سنين كده
ابقي افتكر اسئلي نفسك سؤال التضحية ده تاني
--------
وايه المواصفات بتاعة فتي الاحلام دي
احلمي على قدك شوية
:P
وكمان عايزاه ليه
لسان نزار واحاسيسه
ورجوله رشدى اباظة
وكمان أمور ومثقف ومتفتح وبيغير عليكي
طيب
هي الاحلام بفلوس
احلمي براحتك
:)
شكرا علي التاج
و جاري الرد
معلش النت قاطع و قالولي حيجي علي بليل
حسبي الله و نعم الوكيل
و لا أقولك بقت سب الايام دي
خليها ربنا يسامحهم
و ان لله و ان لله راجعون
رينـــــــــــا
اولا ميرسى على انك قريتى هرتلاتى النفساوية :-)
ثانيا بصى ياستى
الولد لو متدين صح
وبيحب الرسول بجد حيشغل مخه لان دينا بيأمر بده
يشغل مخه يعنى يشوف ايه اللى يحبب فيه الناس ويوصل رساله اسرع ويخليه متكيف جدا ومحبوب وصورة حلوة لدينه
بأنه يشوف الناس بتعمل ايه عشان تندمج مع بعض
بصى انا رأيى ان عمرو خالد نموذج للشاب المتكيف
لو لبس جلابيه وتمسك ( بمظاهر رسول الله) مكنش حد ارتحاله وسمعه بالشعبية دى حتى برة سمعوه وحبوه
ثم الرسول لبس ده لان ده كن لبس وقته ومكانه يمكن لو كان فى مكان اخر وزمان اخر مكنش لبس كده...
ثم ان الرسول لبس لبس الرومان والفرس والمصريين والعجم والعرب عشان يقول ان العبرة مش بالمظهر والبسو اللى يناسب مكانو ووقتكو..عاوزة اقول انى مش البس لبس رسول واقول انا خلاص جبت التايهة...حتى لو اللبس ده دلوقتى لسبب او لاخر حيبعد عنى الناس ويخوفهم منى ويعوق توصيل رسالتى
يالهوى ايه الرغى ده؟؟؟
ميرسى جدا على دماغك وعلى انك خلتينى شرحت وجهة نظرى باستفاضة
ومنورانى كالعادة دايما
شادي فايد
اولا ميرسى كتير على التاج
ثانيا لو هو اتغير بعد 3 او 4 سنين ثق انى مش حكمل حتى لو عندنا مليون بيبى والكلام الفارغ ده
حسيبه ومش حندم لحظة على حبى لو فى يوم وتضحياتى
لانى كنت صح
ثالثا ايه ياعم؟
ماتسيبنى احلم؟؟
ثم هو كتير مواصفاتى؟؟
مش عارفة اصلى .......بدور على حب العمر او على ميناء مسافرش بعدها اظن انى دى مواصفات مش فظيعة بالنسبة لميناء اقامة مدى الحياة واللا ايه؟؟
نورتنى بأول تعليقاتك فى مدونتى المتواضعة :-)
...............
t3ban
عفوا يافندم
ووالنبى ماتدعى على حد دى ايام امتحانات ومفترجة تلف وتلبس فينا
بص جاوب براحتك
ومنورنى يابرنس
عزيزتي البتاع...عندي ترزي رجالي يفصلك عريسك ده على المقاس تمام...و عموما ما تقلقيش...النساء قادمات...كلها كام سنة و هنعمل ركن في المتحف نحط فيه هيكل عظمي نكتب تحتية..كان يعيش في الارض كائن اسمة رجل وا نقرض...لكن ما تزعليش..ممكن دايما نستورد حاليا في جمعيات في روسيا بدل ما هتصدرلنا رقصات هيصدرولنا عرسان...المهم..اجاباتك لذيذة بس بصراحة حكاية سيلانترو دي فقعتني شوية..ده كل فروعة زي ما تكون غرز حشيش..لكن نقول ايه...ارزاق..تحياتي...
اولا
الف شكر يا سيدتي ان انا كنت من اللي جم علي بالك دلؤتي
ومع اني مبحبش ادخل في موضوعات التاج دي
ومع انك جاوبتي تقريبا نفس الاجابات اللي في دماغي
مع تغير بعضها طبعا
الا اني هجاوب عليه
علشان خاطر اهتمامك بس
مرسي
اولا شكرا يا قمر على انك اهتميتى بالرد
بس انا قلت ليكى فى الاول انى متفقه معاكى ان الدين مش بالمظهر وبس
اولا انا اعتراضى اننا فرضنا ان كل الناس دى لاغيه عقلها على اى اساس حكمتى بكدا؟؟
ومين قال ان الناس دى مش بتوصل رسالتها؟؟
لا الناس دى ليها رساله وبتوصل الحمد لله
ومعترضه تماما ان الزى دلواقتى هو اللى بيعيق اى حد لتوصيل رسالته اللى عايز يوصلها فى حياته
العقل هو اللى بيحكمنا وهو اللى بيوجهنا مش ملابسنا يا جميله
مين قال انه لو لبس جلبيه مكنش حد ارتاحله
عمرو خالد موصلش لينا بلبسه عمرو خالد وصل لينا با اسلوبه وفكره
وانا معترضه تماما ان فكرة ان الزى الاسلامى دا ممكن يعيق اى حد فى توصيل رسالته والامثله كتير حوالينا
هو انا حاسه انى زهقتك :D
ميرسى ليكى كمان انك اديتينى مساحه ادافع عن ناس مظلومين للاسف
اوعى تزهقى منى :D
اموووووت واعرف حاجة
مين اللي قالك ان المسئول لازم يكون اصلع؟!!!!!!!!!!!!
حاجة غريبة جدا يعني
وبعدين تمرري التاج للناس دي وتنسيني وانا اللي كنت ناوي امرره ليكي
فعلا....يابخت من بات مغلوب ولا بات غالب
وبعدين صديقي شادي مرر لي التاج قبلك...هيـــــــــه
وبعدين اعمل بوست ويعدي عليه يومين وماتعلقيش
غلطاتك كترت وليكي غلطتين وبعدها مش لازم تعيشي ليوم التلات اللي جاي
ايه ده هو ده اول تعليق
تصدقي مخدتش بالي
اتاريكي
اممممم
:)
أنا من يوم مازورتي مدونتي وانا متابعك
:)
بس معقول محطتش كومنت
يلا حصل خير
:)
اعجبتني اجاباتك
تحياتي عزيزتي
ياسلاااااام!
والله عندك حق.. التاج بيحط الواحد في مواقف اعتراف جامدة!
أحب شخص ليكي نفسك؟
هممم.. نرجسية!.. مجلدات نزار؟.. رومانسية و..! إنما بقى تقريهم وتدوخي.. مع شيكولاتة؟؟؟ دي اللي غريبة قوي!
واضح ان جهازك لسة جديد على فكرة.. أو انتي ثرية ثراء فاحش بتغيري الجهاز كل سنة!
واضح انك ما تعرفيش عن المتدينين دول غير كلام السينما.. هما مش كده خالص..
شكرا على التاج يا فندم.. هو حقيقي مقلب؛ لأن فيه أسئلة كده... المهم شكرا يعني!
اديني جاوبت علي التاج ياستدي
يلا بقي قوليلي رايك
أنا عاجبني ردك على التاج قوي بس في نقطة وقفتني وحاولت أفهم قصدك بس مقدرتش ..وباختلف معاكي فيها ..وهي إن مصر ساقطة ترفض التقويم .. متهيألي مصر عمرها ما تتوصف الوصف ده أبدا .. لأن على مدار تاريخها كله عمر مصر ولا عمرها هتكون ساقطة .. بس العيب فينا احنا (حكومة و شعب ) احنا اللي ممكن نذلها وممكن نعلي اسمها وكرامتها ..
تحياتي بجد ..
بجد بجد اسفة جدا عن الانقطاع اللى دام يومين ده
لا كنت بذاكر ولا نيلة هو الموضوع ان ضمير الامة اللى موصلى نت حب يعمل فيها محافظ وطلب من تى اى داتا تقفل المواقع المخلة
فقامت الشركة مشكورة بقفل كل المدونات بحكم ان مفيش اخلال اكتر من كده
بس
وفضلت انا اعيط اليومين دول لحد ماصلح المشكلة
وادينى جيت
وحرد على نفر نفر فيكو ياشعب
sokoothansawat
منورة مدونتى المتواضعة
بس يالهوى
!!!!!!
ايه موضوع المتحف ده؟؟
طب عينولى واحد قبل الموضوع ده ...ده انا غلبانة
وبعدين انا مبحبش الراجل الروسى
اقولك رشدى تقولى روسى؟؟
هاتيلى من اطالية كده واللا حاجة
اسبانيا ميضرش
وسلينترو غرزة يامفترية؟؟
ده اجمل مكان فى الكون
فكرتينى اروح بكرة اخد قهوة هناك
مش حقول انهى فرع عشان المعجبين
ههههههههههههه
نورتينى كمان مرة وابقى تعالى زروينا
...........
احمد عبد الهادي
الله يخليك
اخلص اللى فى ايدى واجى ابظ على ردودك عندك
..............
رينـــــــــــا
انا شايفة اننا كده صح
لولا اختلاف الاذواق لبارت السلع
عموما احنا اختلافنا مش جوهرى
بس انتى صح
وانا اعتقد ان انا صح
يبقى لا يضير احد ان كل حد فينا تتمسك برأيها
نورتينى بصدق والله
وياريت تنورينى دايما
.............
A.SAMIR
بص ياسيدى
المسئول بيبقى مسئول فبيتخن
فدماغه بتكبر والشعر بيضيق عليها فبيصلع
فهمت بقى؟
ههههههههههه
وبعدين انا اقسم بالله بعد مامررتلك التاج مسحته لانى عرفت ان شادى مررهولك مش حيبقى انا وهو يعنى
شفت بقى ان انا اللى بت مغلوبة؟؟
اهئ اهئ اهئ
الله يسامحك
ثم ياباشا انا شرحت انا ليه مشفتش اخر بوست ليك
ضمير الامة كان تاعبنى شوية
ارجوك سامحنى وحجرى حالا اعلق عندك لما اهريك
بس برضه لو عندك طريقة تخلينى معيش ليوم الاحد انا موافقة عشان دى بداية امتحاناتى :-)
منورنى ياسمورة ياعسل
...............
شادي فايد
شفت بقى ليا حق افجع ازاى؟؟
عموا يامعلم نورك غرق النت كله مش بس مدونتى اعتبر كوممنتاتك اللى مبعتهاش وصلت :-)
نورنى على طول
...............
صاحب البوابــة
ربنا يخليك يارب
ايوة كده اجبر بخاطرى مش عريس تفصيل وتريقة؟؟
!!!!!!
منورنى ياباشا
...........
Davinci
والله يافندم انا بجدد جهازى كل مايطلع حاجة جديدة وبلاش اقولك على الحبشتكانات اللى فى جهازى عشان متضربنيش :-)
وقليل من النرجسية لن يضير احدا
واللا ايه؟؟ :-)
ثم ان انا مش فاهمه الاسلاميين دول غلط
انا كل اللى بقوله ان الاسلام بيتحارب فنقطع عليهم طريق بيخشولنا منه
عموما ياعم كل واحد حر فى رأيه
وبالنسبة للشيكولاتة ممكن تعرف هى مقامها عندى ايه من اللست بتاعت معيناتى على الحياة محطوطة بعد نزار على طووول
منورنى ياصديقى العزيز
ويالا حل خليك شطور عشان اجيبلك حاجة حوة:-)
................
احمد عبد الهادي
عنية يامعلم رايحة اهه
.............
Mohamed
منورنى يامحمد
اظن انت اول مرة ترد عندى؟؟
عموما هى مصر ايه غير شعب وحكومة؟؟
يعنى انت بنفسك بتأكد كلامى
لانى اكيد مقصدش مصر الاهرامات والشوارع واللا ايه؟؟
وميرسى كتير على المتابعة
وياريت تنورنى دايما
......................
......................
والان وبعد كل هذا الكم من الردود مرة واحدة
بجد بجد الحمدلله انى مطلعتش محررة باب قلوب حائرة :-)
تاج لذيذ... علي فكره أنا كمان بموووت في بطوط و بحب عم دهب جدا رغم بخله...بس بجد هو لذيذ موووت في بخله و ساعات بحلم و انا بعمل غطس في تل الفلوس بتاعه ده..ههههههه..باذن الله تلاقي فارس احلامك و ربنا يوفقك
تحياتي لكي
يااااه انت مش متخيل يامايكل
حلم حياتى اغطس فى البانيو ده
ونفسى كمان فى ان كان تبقى عقليتى استثمارية فذة زيه
وان يبقى عندى حظ محظوظ
ودليل الاشباااال
انا حكتب بوست قريب عند دليل الاشبال ده
عندى كلام كتير عنه اوى
نورتنى بجد بجد ياميكو
ونورنى دايما
ههههههههه..الله الله..ده أنتي طلعتي ميكاويه كبيره زيي..هههههه...أنا كما بحلم بحظ محظوظ و عشا ن كده أدخلي علي مدونتي النهارده أو بكره و شوفي اخر بوست حيكون عن ايه
تحياتي لكي
لالالا اوعى تكتب عن دليل الاشبال لافضحك اه
ماشى؟؟؟
:-)
عموما انا كل يوم حبقى عندك بكرة ايه وبعده ايه؟؟
انا لاجئة هناك اكتب انت بس ملكش دعوة
:-)
عزيزتي البتاع
بوست جامد وردود اجمد
على فكرة انا كمان بحب نزار موووووت خاصة القصيدة اللي شغالة عندك دي , وكمان احمد خالد توفيق دول اللي محليين علي الدنيا وطبعا بطوط وعم دهب دول صحابي من وانا أد كدة
بس انا بأى مطيقش ريحة الشيكولاتة
اتشرف لو رحتي المدونة بتاعتي.
Big Code
عزيزى الكود
بصرة كتير كتير لحد الشيكولاتة مفترق الطرق بينا
دى حبيبتىىى
انت بس جرب تحبها وتتأملها وتشمها برومانسية
يالهوىىىى
عموما تحبها ليه؟
الشيكولاته اختراع حريمى اصلا
وعمر الرجالة ماحيفهمو العلاقة بينا :-)
نورتنى كتير ويارب يكون قصيدة نزار عجبتك
هاى يابتاع
مش مهم انا مين دلوقت بس المهم انا بموت ف حاجه اسمها فريندس لو عندك حلقات منها على الجهاز وعندك استعداد نبدل حلقات ده يكون رائع
انا عندى تقريبا نص المسلسل بس على اكتر من موسم
my mail
amir_s_anwar@yahoo.com
computerscience088@hotmail.com
plz contact me
عزيرى الانونيموس
ايه الخطفة دى؟؟
براحة عليا خضتنى
للاسف ياعزيزى كان عندى وضاعو فى الوبا
بس اكيد حجيب تانى
ابقى طل عليا كل فترة واسأل وانا حقولك لما اجيبهم نورتنى رغم ان البوست مجابش سيرتهم بس لاويهمك :-)
هاى تانى
سورى ع الدخله دى بس المشكله انى بعشق ال شو ده ومستعد اعمل اى حاجه علشان اجيب اى حلقه مش عندى .. نسيت اقوللك ان عندى بدون مونتاج لبعض المواسم وكمان لقاء ليهم فى برنامج اوبرا.. لو فى اى جديد ياريت تبعتي على الاميل لانى ظابط جيش وممكن اقعد بال10 ايام مادخلش نت
شكرا thanx merci
amir samir
عزيزى الانونيموس تانى مرة
منورنى جدا
بس والله ماعندى حاجة ليهم حاليا
بتابعهم زى عامة الشيعب على وان تى فى وام بى سى 4
عادى يعنى جرب تتابعهم
بالنسبة لموضوع الجيش
والله ياباشا انا بحب الحكومة
كلام بينى وبينك انا دسيسة هنا
بس اوعى تقول لهم
ده انا اتعصر انقط وزرا بيجرو فى دمى ياباشا
وعشان انت جيش بس حدورلك على الحلقات واجيبها لحد البيت ياباشا
اى خدمات ياباشا
اى خدمات
:-)
منورنى
هههههههه
السؤال ده كنت لسة بتسأله النهاردة من واحدة جايبالى عريس
بص
يكون مثقف
متفتح
مش حمار بتاع انا شرقى وانتى بنت وانا ولد
بس يكون شرقى بيغير عليا
يعنى.......يحمينى حتى اخر قطرة فى دمه
وفى نفس الوقت حنين حتى النخاع
ويتقبلنى زى ماانا ((ويعشق تفاصيلى)) و
يتحمل مسئوليتى من غير مايقولى انه متحملها
يحسسنى انى طفلة من غير مايهين ذكائى ولا
استقلاليتى
يكون عنده لسان نزار واحاسيسه
ورجوله رشدى اباظة فى فيلم " صغيرة على الحب" يحسسنى
دايما انى صغيرته وسيدته وملكة قلبه
ويكون امور طبعا
انا مقلتهاش فى الاول دى؟
يعني ايه كل المواصفات دي
البنات دول يا اخي
معيجبهومش العجب
هيثم ابوعقرب
منورنى
بس احم
مكانش لازم تنقلها عشان تناقشنى فيها
لانى ببساطة عارفاها :-)
والله انا مطالبى مش كتير
لا جبت سيرة فلوس وعيلة ولا شغل ولا منصب
ده انا متواضعة والله
النفـــــــــس بقى تقول ايه؟ :-)
عموما منورنى كتير ياهيثوم
وياريت تنورنى دايما
Post a Comment